ބްރެޒިލްގެ ސައޮ ޕައުލޯއަށް ވެއްޓުނު މަތިންދާ ބޯޓުން ދަތުރުކުރި އެންމެން މަރުވެފައިވާއިރު، އެ ބޯޓުގައި ކެންސަރަށް ފަރުވާދޭ 15 ޑޮކްޓަރުން ތިބިކަމަށް، އެ ގައުމުގައި ކެންސަރާ ގުޅުންހުރި ފަރުވާތައް ދިނުމަށް މަސައްކަތް ކުރާ ޖަމްއިއްޔާއަކުން ހާމަކޮށްފިއެވެ.

"ބްރެޒިލިއަން ސޮސައިޓީ އޮފް ސެލިއުލާރ ތެރަޕީ އެންޑް ބޯން މެރޯ ޓްރާންސްޕްލާންޓޭޝަން" އިން ހާމަކޮށްފައިވާ ގޮތުގައި، އެ މަތިންދާ ބޯޓުގައި ތިބި ކެންސަރަށް ފަރުވާދޭ ޑޮކްޓަރުންނަކީ، އެ ޖަމްއިއްޔާއިން ބާއްވަން ނިންމާފައި އޮތް ކޮންފަރެންސް (އެސްބީޓީއެމްއޯ2024)ގައި ބައިވެރިވުމަށް ސައޮ ޕައުލޯއަށް ދަތުރު ކުރަމުން ދިޔަ ޑޮކްޓަރުން ތަކެކެވެ.

މިކަމާ ގުޅިގެން ސޯޝަލް މީޑިއާގައި ބައެއް ފަރާތްތަކަކުން ބުނަމުން ދަނީ، މިއީ ރާވައިގެން ހިންގި ކަމެއް ކަމަށެވެ. އަދި މިކަމުގެ އަޑީގައި ތިބޭނީ ފާމަސިއުޓިކަލްސް އުފައްދާ ފަރާތްތައް ކަމަށް ސޯޝަލް މީޑިއާގައި މި ވާހަކަތައް ދައްކާ ފަރާތްތަކުން ތުހުމަތުކޮށްފައިވެއެވެ. ސަބަބަކީ ކެންސަރަށް ފަރުވާއެއް ހޯދިއްޖެނަމަ، އެމީހުންގެ ވިޔަފާރިތަކަށް އަސަރުކުރާނެތީއެވެ. ނަމަވެސް އެއްވެސް ރަސްމީ އިދާރާއަކުން މިކަމަށް ބާރު ލިބޭ އެއްވެސް ވާހަކައެއް އަދި ހާމަކޮށްފައެއް ނުވެއެވެ.

މި ހާދިސާއާ ގުޅިގެން، މަރުވެފައިވާ މީހުންގެ ހަށިގަނޑުތައް ވަކިކުރުމުގެ މަސައްކަތް ބްރެޒިލްގެ ފޮރެންސިކު ޓީމަކުން ވަނީ ފަށައިފިއެވެ. މިކަމުގައި އެހީތެރިވުމަށް، އެ ފްލައިޓުން ދަތުރު ކުރި މީހުންގެ އާއިލާތަކަށް ވަނީ އެދިފައެވެ. އެހެންކަމުން، އެމީހުންގެ އާއިލާތައް މިހާރު ދަނީ ހަށިގަނޑުތައް ބަހައްޓާފައި ހުރިތަނަށް ޖަމާވަމުންނެވެ.

މި ހާދިސާގައި މަރުވީ 61 މީހުންކަމަށް ބްރެޒިލް އިން ކުރިން ހާމަކޯށްފައިވީނަމަވެސް، އެ ބޯޓުގައި 62 މީހުން ތިބި ކަމަށާއި އެ އެންމެން މަރުވެފައިވާކަމަށް ބްރެޒިލްގެ ސަރުކާރުން ފަހުން ވަނީ ހާމަކޮށްފައެވެ. އެއީ 58 ޕެސެންޖަރުންނާއި 4 ފަޅުވެރިންނެވެ.

ސައޮ ޕައުލޯގެ ސްޓޭޓް ސަރުކާރުން ހޮނިހިރު ދުވަހު ހާމަކޮށްފައިވާ ގޮތުގައި، ވެއްޓުނު ބޯޓުގައި 34 ފިރިހެނުންނާއި 28 އަންހެނުން ތިއްބެވެ. އަދި މިއެންމެންގެ ހަށިގަނޑުތައް އެ ސަރަހައްދުން ފެނިފައިވާކަމަށް ވެސް ބުނެފައިވެއެވެ.