ރާއްޖޭގެ ފުރަތަމަ ސްމާޓްޝޮޕް އެސްޓީއޯއިން ހުޅުމާލޭގައި ހުޅުވައިފިއެވެ. 

މިކަމަށްޓަކައި މިއަދު ބޭއްްވި ޚާއްޞަ ރަސްމިއްޔާތުގައި މި ފިހާރަ ހުޅުއްވައި ދެއްވީ ރައީސުލްޖުމްހޫރިއްޔާގެ ނައިބު ފައިޞަލް ނަސީމެވެ. އެމަނިކުފާނުގެ އަރިހުގައި އެސްޓީއޯގެ މެނޭޖިންގ ޑައިރެކްޓަރ ޢަބުދުﷲ ސަޢީދު ބައިވެރިވެވަޑައިގެންނެވިއެވެ.

އެސްްޓީއޯގެ މި ސްމާޓް ފިހާރައަކީ، އާޓިފިޝަލް އިންޓެލިޖެންސްގެ އެހީގައި ވިޔަފާރިކުރެވޭ ގޮތަށް ފަރުމާކޮށް ހުޅުވި ރާއްޖޭގެ ފުރަތަމަ ސްމާޓް ފިހާރައެވެ. 

މިފިހާރައިން ވިޔަފާރި ކުރެވޭނީ، އެސްޓީއޯއިން ތަޢާރަފްކޮށްފައިވާ، ޚާއްސަ އެޕްލިކޭޝަނެއް ބޭނުންކޮށްގެންނެވެ. މިއެޕްލިކޭޝަން ގޫގުލް ސްޓޯރ އިންނާއި އައިޓިއުންސް ސްޓޯރ އިން ޑައުންލޯޑް ކުރެވޭނެއެވެ. އަދި ފިހާރައިން ވިޔަފާރު ކުރުވުމުގައި އަމަލު ކުރަންޖެހޭ ގޮތްތައް ފިހާރައިގެ ބޭރުގައި އާއްމުންނަށް އެނގޭނެހެން ބަހައްޓާފައިވެއެވެ. 

މިރަސްމިއްޔާތުގައި ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި މިއީ ޒަމާނީ ޓެކްނޮލޮޖީއާއެކު ލިބިގެންދާ ވަރަށް ބޮޑު ފަސޭހައެއްކަން ފާހަގަކުރެއްވިއެވެ.

އެސްޓީއޯގެ ސްމާޓް ޝޮޕްއިން ވިޔަފާރި ކުރުމަށް، ފޯނާއި ފޭސް ރިކޮގްނިޝަންވެސް ބޭނުން ކުރެވޭނެއެވެ. އެޕްޑައުންލޯޑް ކުރުމަށްފަހު، ރެޖިސްޓްރީކޮށް ކަސްޓަމަރުގެ ކާޑުގެ މައުލޫމާތު އެންޓަރ ކުރުމުން، ފިހާރައަށް ވަދެވޭނެއެވެ. 

އެސްޓީއޯގެ ސްމާޓްޝޮޕްގައި މައިގަނޑުގޮތެއްގައި ލިބެން ހުންނާނީ ކާބޯތަކެތީގެ ތެރޭގައި ހިމެނޭ ދަޅާއި ފުޅި އަދި ޕެކެޓްގައި ބަންދުކޮށްފައިވާ ކާނާގެ ބާވަތްތަކެވެ.

އެސްޓީއޯ ސްމާޓް ޝޮޕް ހުޅުވާފައި ވަނީ ހުޅުމާލޭ ފޭސް 1ގައި ކުރިންވެސް އެސްޓީއޯގެ ފިހާރަ ހިންގި ތަނުގައެވެ.