ފްރާންސްގެ ޕެރިހުގައި މިހާރު ކުރިޔަށްދާ އޮލިމްޕިކްސްގެ ފިރިހެން ފުޓުބޯޅައިގެ ފައިނަލުގައި ފްރާންސް ބަލިކޮށް ސްޕެއިނުން ރަން މެޑަލް ކާމިޔާބުކޮށްފިއެވެ.

ފްރާންސުން ސްޕެއިންގެ މައްޗަށް ކުރި ހޯދީ 5-3 ގެ ނަތީޖާއަކުންނެވެ.

މެޗުގެ ފުރިހަމަ ވަގުތު ހަމަވިއިރު، 3-3 އިން ނަތީޖާ ހަމަހަމަވެފައި އޮތުމުން، ސްޕެއިން ކޮޅަށް މެޗު އަނބުރާލީ އިތުރު ވަގުތުގެ ދެ ހާފުގައެވެ.

މެޗުގައި ފުރަތަމަ ލީޑު ނެގީ ފްރާންސެވެ. ނަމަވެސް މެޗުގެ 11 ވަނަ މިނެޓުގައި އެ ޓީމުން ގޯލެއް ކާމިޔާބުކޮށްފައި ވަނިކޮށް، ސްޕެއިނުން ވަނީ ފުރަތަމަ ހާފު ނިމުމުގެ ކުރިން، ފަހަތުން އަރާ 3 ގޯލުޖަހާފައެވެ.

ހިތްވަރު އެލުވާނުލައި ފްރާންސުން ކުރި މަސައްކަތުން، އެ ޓީމަށް ދެވަނަ ހާފުގައި ދެ ގޯލު ކާމިޔާބު ކުރެވުނެވެ. ފްރާންސުން އެއްވަރު ކުރި ގޯލަކީ މެޗުގެ އިތުރު މިނެޓުގައި ލިބުނު ޕެނަލްޓީއަކުން ކާމިޔާބުކުރި ގޯލެކެވެ.

އިތުރު ވަގުތުގައި ސްޕެއިނުން އެމީހުންގެ ކޮޅަށް ނަތީޖާ އަނބުރާލީ ކޮންމެ ހާފެއްގައި ގޯލެއް ޖަހާ، 5-3 އިން މެޗު ކާމިޔާބުކޮށްގެންނެވެ.

ސްޕެއިނުން އެންމެ ފަހުން ޓޯކިޔޯގައި ބޭއްވި އޮލިމްޕިކްސްގެ ފައިނަލުގައި ވަނީ، އިތުރު ވަގުތުގެ ދެ ހާފް ކުޅެގެން، ބްރެޒިލް އަތުން ބަލިވެފައެވެ. ނަމަވެސް މި ފަހަރު ސްޕެއިނުން މިވަނީ ފްރާންސް ބަލިކޮށް، 1992 ވަނަ އަހަރަށް ފަހު ފުރަތަމަ ފަހަރަށް އޮލިމްޕިކްސް ފުޓްބޯޅަ އިވެންޓުން ރަން މެޑަލް ހޯދައިފައެވެ.

ތިން ވަނަ ހޮވަން ކުޅުނު މެޗުގައި، މޮރޮކޯ އިން ވަނީ މިސްރުގެ މައްޗަށް ފަސޭހަ މޮޅެއް ހޯދައިފަ އެވެ. އެ ގޮތުން މިސްރު އަތުން މޮޮރޮކޯ މޮޅުވީ، 6-0 އިންނެވެ. މިއީ، މި ފަހަރުގެ މުބާރާތުގެ އެންމެ ތަފާތު ބޮޑު މޮޅެވެ.