ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިއުލާނުކުރައްވާފައިވާ، 5 މިލިޔަން ގަސް ޕްރޮގްރާމާއި އަދި އިންޑިއާގެ ބޮޑުވަޒީރު ނަރެންދްރަ މޯދީ ފައްޓަވާފައިވާ، ވަން ޓްރީ ފޯ މަދާ ޕްރޮގްރާމުގެ ދަށުން އިންޑިއާގެ ޚާރިޖީ ވަޒީރު، ޑރ. އެސް ޖައިޝަންކަރާއި، ރާއްޖޭގެ ޚާރިޖީ ވަޒީރު މޫސާ ޒަމީރު މާލޭ ލޮނުޒިޔާރަތް ޕާކުގައި ގަހެއް އިންދަވައިފިއެވެ.

މިރަސްމިއްޔާތު ބާއްވާފައި ވަނީ، މިއަދު މެންދުރު ކުރީގައި މާލޭ ލޮނުޒިޔާރަތްކޮޅު ލޮނުޒިޔާރަތްޕާކުގައެވެ. ދެބޭފުޅުން ލޮނު ޒިޔާރަތްޕާކުގައި  މިއަދު އިންދެވި ގަހަކީ، ކާމަރަނގަ ގަހެކެވެ. މިގަހަކީ، ދިވެހިރާއްޖެއާ އިންޑިއާގެ އެކުވެރިކަމުގެ ގުޅުން ރަމްޒުކޮށްދިނުމުގެ ގޮތުން އިންދެވި ގަހެއް ކަމުގައި މިނިސްޓްރީ އޮފް ކްލައިމެޓް ޗޭންޖް އެންވަޔަރަންމެންޓް އެންޑް އެނާޖީ އިން ހާމަކުރައްވާފައިވެއެވެ.

ގަސްއިންދުމުގެ މިރަސްމިއްޔާތުގައި، އިންޑިއާގެ ޚާރިޖީ ވަޒީރު، ޑރ. އެސް ޖައިޝަންކަރާއި، ރާއްޖޭގެ ޚާރިޖީ ވަޒީރު މޫސާ ޒަމީރުގެ އިތުރުން އެންވަޔަރަންމަންޓް މިނިސްޓަރ ޠާރިޤާއި، ރާއްޖެއަށް އިންޑިއާއިން ކަނޑައަޅުއްވާފައިވާ ސަފީރު މުނޫ މުހާވަރުގެ އިތުރުން މާލޭ ސިޓީގެ މޭޔަރު އާދަމް އާޒިމާއި، އިންޑިއާ އާއި ދިވެހިރާއްޖެއާ ދެޤައުމުގެ ޚާރިޖިއްޔާގެ އިސްބޭފުޅުން ބައިވެރިވެވަޑައިގެންނެވިއެވެ. 

އިންޑިއާގެ ބޮޑުވަޒީރު ނަރެންދްރަ މޯދީގެ ވަން ޓްރީ ފޯ މަދާ ޕްރޮގްރާމް އިންޑިއާގައި ފަށާފައި ވަނީ، މިއަހަރުގެ ޖޫން މަހުގެ 6 ވަނަ ދުވަހު، ދުނިޔޭގެ ތިމާވެށީގެ ދުވަހުގެ ހަރަކާތްތައް ފާހަގަކުރުމުގެ ގޮތުން ހިންގި ހަރަކާތްތަކާއި ގުޅުވައިގެންނެވެ. 

ސަރުކާރުގެ މެނިފެސްޓޯގައި ހިމަނާފައިވާ ތިމާވެށީގެ ދާއިރާގެ، މުހިންމު ރިޔާސީ ވައުދުތަކުގެ ތެރޭގައި ހިމެނޭ، ފަސް މިލިއަން ގަސްއިންދުމުގެ ޕްރޮގްރާމް، ދުނިޔޭގެ ތިމާވެށީގެ ދުވަހުގެ މުނާސަބަތާއި ގުޅުވައިގެން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު ފައްޓަވައިދެއްވީ މިއަހަރުގެ ޖޫންމަހުގެ 5 ވަނަ ދުވަހުގައެވެ.

ދުނިޔޭގެ ތިމާވެށީގެ ދުވަހުގެ ގޮތުގައި ފާހަގަކުރަމުން އަންނަނީ ކޮންމެ އަހަރެއްގެވެސް ޖޫން މަހުގެ 5 ވަނަ ދުވަހެވެ.