ބްރެޒިލްގެ ސައޮ ޕައުލޯ މަތިން ދަތުރުކުރަމުން ދިޔަ ބޯޓެއް ވެއްޓި، އޭގެން ދަތުރުކުރި 61 މީހުން މަރުވެއްޖެއެވެ.

މި ބޯޓު ވެއްޓިފައިވަނީ ހުކުރު ދުވަހުގެ މެންދުރުފަހުގެ ވަގުތެއްގައި، ވިނޭޑޯ ކިޔާ ކުޑަ ރަށެއްގެ މީހުން ދިރިއުޅޭ ޢިމާރާތްތައް ހުންނަ ސަރަޙައްދަކަށެވެ.  މިއީ ބްރެޒިލްގެ ޕަރާނާ ސްޓޭޓުގެ ކަސްކަވެލް އިން ފުރައިގެން ސައޮ ޕައުލޯއަށް ދަތުރު ކުރަމުން ދިޔަ، އެ ގައުމުގެ ވިޔޯފާސް އެއާރލައިންގެ މަތިންދާ ބޯޓެކެވެ.

މި ހާދިސާގައި މަރުވި މީހުންގެ ތެރޭގައި ބޯޓުގެ ފަޅުވެރިން ވެސް ހިމެނެއެވެ. އަދި އެ ގައުމުގެ ސިވިލް ޑިފެންސް ފޯސްއިން ހާމަކޮށްފައިވާ ގޮތުގައި، މި ހާދިސާއާ ގުޅިގެން ބޯޓު ވެއްޓުނު ސަރަހައްދުގައި ހިމެނޭ ގިނަ ގެތަކެއް ވަނީ ބިމާހަމަވެފައެވެ.

މި ހާދިސާ ހިނގުމަށް މެދުވެރިވި ސަބަބެއް ހޯދުމުގެ މަސައްކަތް، އެ ގައުމުގެ ސެންޓަރ ފޯރ އިންވެސްޓިގޭޝަން އެންޑް ޕްރެވެންޝަން އޮފް އެރޮނޯޓިކަލް އެކްސިޑެންޑްސް އިން މިހާރު ވަނީ ފަށާފައެވެ. އެ އިދާރާއިން ހާމަކޮށްފައިވާ ގޮތުގައި، ބޯޓު ވެއްޓުނު ސަރަހައްދުން ބޯޓުގެ ކަޅުފޮށި ވަނީ ފެނިފައެވެ. އަދި އެ އިދާރާގެ ވެރިޔާ މަރްސެލޯ މޮރޭނޯ ވިދާޅުވީ، ބޯޓަށް މައްސަލައެއް ކުރިމަތިވެގެން އުޅޭ ކަން އެއަރ-ޓްރެފިކް ކޮންޓްރޯލަރުންނަށް ޕައިލެޓުން ހިއްސާ ކޮށްފައި ނުވާކަމަށެވެ.