ހުޅުމާލޭގެ އެކި ސަރަހައްދުތަކުގެ ދުވާރު މަތީގައި އަދި ހެޖު ތެރޭގައި ކެފޭ، ރެސްޓޯރެންޓް އަދި ޓޭކް-އަވޭ ޕޮއިންޓުތަކުން ގޮނޑި މޭޒު ބަހައްޓައިގެން ޚިދުމަތްދެމުން ގެންދާތީ އެކަން މިއަދުގެ ނިޔަލަށް ހުއްޓާލުމަށް ހުޅުމާލެ ޑިވެލޮޕްމެންޓް ކޯޕަރޭޝަން (އެޗްޑީސީ) އިން މި މަހުގެ 1 ވަނަ ދުވަހު އަންގާފައިވީނަމަވެސް، އެ އެންގުމަށް ޖުމްލަ ގޮތެއްގައި އެއްވެސް ތަނަކުން އަދި މިހާތަނަށް ތަބާވެފައެއް ނުވެއެވެ.

އެޗްޑީސީގެ އެންގުމުގައި މިއަދުގެ ކުރިން ދުވާރު މަތިން ގޮނޑި މޭޒު ބަހައްޓައިގެން ޚިދުމަތްދިނުން އަންގާފައިވުމާ ގުޅިގެން، މިކަމަށް މި ތަންތަނުން އިޖާބަދީފައިވާ މިންވަރު ބަލާލުމަށް، "ނޫން" ގެ ނޫސްވެރިއަކު ވަނީ މަސައްކަތްކޮށްފައެވެ. ނަމަވެސް، ގާތްގަނޑަކަށް އެއްވެސް ތަނަކުން މި އެންގުމަށް އިޖާބަދީފައި ނުވާކަން ވަނީ ފާހަގަ ކުރެވިފައެވެ.

އެޗްޑީސީއިން މި މަހުގެ 1 ވަނަ ދުވަހު ނެރުނު އިއުލާނުގައި ބުނެފައިވާ ގޮތުގައި، ދުވާރު މަތިން ގޮނޑި މޭޒު ބަހައްޓައިގެން ޚިދުމަތްދިނުން ހުއްޓާލުމާ ހިލާފުވެއްޖެނަމަ، އެ ތަކެތި ނަގައި، އެ ސަރަހައްދުތައް ސާފުކުރުމުގެ މަސައްކަތް ކަމާ ގުޅުން ހުރި އިދާރާތަކާއި ގުޅިގެން ކުރިޔަށް ގެންދާނެއެވެ. އަދި އެ މަސައްކަތުގައި މުދަލަށް ލިބޭ ގެއްލުމަކަށް އެޗްޑީސީއިން ޒިންމާ ނުވާނެކަމަށް ވެސް ބުނެފައިވެއެވެ.

މިކަމުގެ ސަބަބުން މަގުން ހިނގާ މީހުންނަށް އެކަމުގެ އުނދަގޫ އަންނަނީ އަބަދުވެސް ކުރިމަތިވަމުންނެވެ. މީގެ އިތުރުން ސްކޫލު ހިމެނޭ ސަރަހައްދުތަކުގައި މިގޮތަށް ބަހައްޓާފައިވާ މޭޒުތަކުގެ ކައިރީގައި ތިބެ ދުންފަތުގެ އިސްތިއުމާލު ކުރުމުގެ ސަބަބުން އާންމުންނާއި ކުޑަކުދިންނަށް ދުންފަތުގެ ނޭދެވޭ އަސަރު ކުރުމާއި، އަދަބާ ހިލާފު އިބާރާތްތަކުން މުއާމަލާތްކުރާކަމުގެ ޝަކުވާ، ބެލެނިވެރިންގެ އިތުރުން ސްކޫލުތަކުން ވެސް ކުރެއެވެ.