ވިނަރެސް ފްލެޓުތަކުގައި އެކްސެސް ކޮންޓްރޯލް ސިސްޓަމް އަލުން ބޭނުންކުރަން ފަށަން އުޅޭކަމަށް، ހުޅުމާލެ ޑިވެލޮޕްމެންޓު ކޯޕަރޭޝަން (އެޗްޑީސީ) އިން ބުނެފިއެވެ. އެގޮތުން، އެ ކުންފުނިން ކުރި އިއުލާނެއްގައި ބުނެފައިވަނީ، 11 އޯގަސްޓު 2024 އިން ފެށިގެން އެކްސެސް ކޮންޓްރޯލް ސިސްޓަމް އަލުން ބޭނުންކުރަން ފެށުމަށް ހަމަޖެހިފައިވާ ކަމަށެވެ.

ވިނަރެސް ފްލެޓުތަކުގައި ފުރަތަމަ ފަހަރަށް އެކްސެސް ކޮންޓްރޯލް ސިސްޓަމް ހަރުކޮށް، އޭގެ ބޭނުންކުރަން ފެށިތާ މާ ގިނަ ދުވަސްތަކެއް ނުވެ، މިދިޔަ ޖޫން މަހުގެ 28 ވަނަ ދުވަހު އެތަނުން އިމާރާތެއްގެ މައިދޮރު ވަނީ މީހަކު ހަލާކުކޮށްލާފައެވެ.

މައުލޫމާތު ލިބިފައިވާ ގޮތުގައި ވިނަރެސް ފްލެޓެއްގެ މައި ދޮރު ހަލާކުކޮށްލީ، އެކްސެސް ކޮންޓްރޯލް ސިސްޓަމް ހަރުކުރުމާ ގުޅިގެން، އެ މީހަކަށް ވަދެ ނިކުމެ ހެދުމަށް އުނދަގޫވުމުންނެވެ. ނަމަވެސް ކޮންމެ ފްލެޓަކަށް ސެކިއުރިޓީ އެކްސެސް ސިސްޓަމްގެ 3 ޓެގް ދޫކުރަމުންދާ ކަމުގައި ވެސް އެޗްޑީސީން އޭރު ވަނީ ބުނެފައެވެ.

ދޮރު ހަލާކުކޮށްލުމާ ގުޅިގެން މި ފުލެޓުތަކުގައި ދިރިއުޅޭ ބައެއް ފަރާތްތަކުން އެކަމުގެ ކަންބޮޑުވުން ފާޅުކޮށްފައި ވެއެވެ.

އެހެންކަމުން، އެޗްޑީސީއިން މިދިޔަ ހަފްތާގައި ކުރި އިއުލާނުގައި ބުނީ، އޭރު ދޮރުތަކަށް ލިބުނު ގެއްލުންތައް މިހާރު މަރާމާތުކޮށްފައިވާ ކަމަށާއި، މިހާތަނަށް އެކްސެސް ކޮންޓްރޯލު ދޮރުގެ ކީ-ޓެގު ނުނަންގަވާ ބޭފުޅުން ވީހާ ވެސް އަވަހަކަށް ވިނަރެސް 10 ގެ މެނޭޖުމެންޓު އޮފީހުން އެ ޓެގު ނެންގެވުމަށެވެ

އަދި އެކްސެސް ކޮންޓްރޯލް ބޭނުން ކުރުމަށްފަހު ދެން އެތަކެއްޗަށް ގެއްލުންދީފި ނަމަ، އެ ފަރާތަކާ ދޭތެރޭ ފިޔަވަޅު އަޅާނެކަމަށް ވެސް އެ އިއުލާނުގައި ބުނެފައި ވެއެވެ.