ރައީސުލްޖުމްހޫރިއްޔާގެ އޮފީހުގައި 345 ސިޔާސީ މުވައްޒަފުން ތިބި ކަމުގައި އެ އޮފީހުން ހާމަކޮށްފިއެވެ.

މިފާއިތުވި 9 މަސްދުވަހުގައި ސަރުކާރުން އައީ ސިޔާސީ މަޤާމުތަކަށް އައްޔަނުކޮށްފައިވާ މީހުންގެ ޢަދަދު ހާމަނުކޮށް ހިފަހައްޓަމުންނެވެ. އަދިވެސް މުލި ސަރުކާރުގެ ހުރިހާ ސިޔާސީ މަޤާމުތަކުގެ ޢަދަދަކީ ކޮބައި ކަމެއް ސަރުކާރުން ހާމައެއް ނުކުރެއެވެ. 

ސިޔާސީ މަޤާމުތަކުގެ ޢަދަދު 700އަށް ވުރެ އިތުރު ނުކުރުމަށް ރިޔާސީ އިންތިޚާބުގެ ކެމްޕޭނުގެ ތެރޭގައި ރައީސުލްޖުމްހޫރިއްޔާ ވަޢުދުވެވަޑައިގެންފައި ވީނަމަވެސް، މިހާތަނަށް މިސަރުކާރުން ސިޔާސީ މަޤާމުތަކަށް ޢައްޔަނުކޮށްފައިވާ މީހުންގެ އަދަދު 2000 ވުރެ މަތިކަމުގައި، އިދިކޮޅު ފަރާތްތަކުން ތުހުމަތުކޮށްފައިވެއެވެ.

ރައީސުލްޖުމްހޫރިއްޔާގެ އޮފީހުން ހާމަކޮށްފައިވާ މައުލޫމާތަށް ބަލާއިރު، އެއޮފީހުގެ ސިޔާސީ މަޤާމުތަކުގެ 345 މުވައްޒަފުން ތިބި އިރު އެމުވައްޒަފުންގެ މުސާރަ އާއި ޢިނާޔަތްތަކަށް އެކަނިވެސް މަހެއްގެ މައްޗަށް 8.2 މިލިޔަން ރުފިޔާ ހޭދަވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދުވެވަޑައިގެންފައި ވަނީ، ސިޔާސީ މަޤާމުތައް މަދުކޮށް، މަތިބަރު ނޫން ސަރުކާރެއް ހިންގެވުމަށެވެ. އެހެން ނަމަވެސް އެމަނިކުފާނުގެ ސަރުކާރުން ސިޔާސީ މަޤާމުތަކަށް ޢައްޔަނުކޮށްފައިވާ މީހުންގެ ޖުމުލަ އަދަދުތައް ރައީސުލްޖުމްހޫރިއްޔާގެ އޮފީހަށްވެސް އެނގިފައި ނުވާކަމުގައި އެއޮފީހުން ކުރިން ބޭއްވި ނޫސްވެރިންގެ ބައްދަލުވުންތަކުގައި، ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސް ޕަރސަން ވިދާޅުވެފައިވެއެވެ.