މަރާމާތަށްފަހުގައި ސިނަމާލެ ބުރިޖުގެ މޮނިއުމެންޓް އަލުން ދިއްލާލައިފިއެވެ.

ބުރިޖު މޮނޮއިމަންޓް އަލުން ދިއްލާލި އިރު މަރާމާތަށްފަހުގައި ބުރިޖު މޮނިއުމަންޓްގެ ކުލައަށްވެސް ބަދަލު ގެނެސްފައިވެއެވެ. މިގޮތުން ބުރިޖު މޮނިއުމެންޓްގައި ކުރިން ހުރި ނޫކުލައިގެ ބަދަލުގައި މިހާރު ލާފައި ހުރީ ވިލުފެހި ކުލައެވެ.

ސިނަމާލެ ބުރިޖު މަރާމާތު ކުރުމުގެ މަސައްކަތް ކުރިޔަށް ގެންގޮސްފައިވަނީ، "ޗައިނާ ކޮމިއުނިކޭޝަންސް ކޮންސްޓްރަކްޝަން ކޮމްޕެނީ ސެކަންޑް ހާބާ އިންޖިނިއަރިން ކޮމްޕެނީ ލިމިޓެޑް" އާއި ހަވާލުކޮށްގެންނެވެ. ބުރިޖު މަރާމާތު ކުރުމުގެ މަސައްކަތް އިތުރު 3 އަހަރަށް އެކުންފުންޏާއި ހަވާލުކޮށްފައި ވަނީ، މިއަހަރުގެ މާރިޗު މަހުގައެވެ.

ޗައިނާ މޯލްޑިވްސް ފްރެޑްޝިޕް ބުރިޖް ބިނާކުރުމުގެ އަމަލީ މަސައްކަތްތައް ކޮށްފައި ވަނީ، ޗައިނާ ކޮމިއުނިކޭޝަން ކޮންސްޓްރަކްޝަން ކޮމްޕެނީ ލިމިޓެޑް (ސީ.ސީ.ސީ.ސީ)އިންނެވެ. ޗައިނާ މޯލްޑިވްސް ފްރެންޑްޝިޕް ބުރިޖު ބިނާކުރުމުގެ މަސައްކަތަކީ، އެހާތަނަށް ރާއްޖޭގައި ހިންގުނު ތަރައްޤީގެ އެންމެ ބޮޑު މަޝްރޫޢެވެ. ބުރިޖުގެ މަސައްކަތް ނިންމައި ހުޅުވީ، 2018 ވަނަ އަހަރުގެ އޮގަސްޓް މަހުގައެވެ. ބުރިޖުގެ މުޅި މަސައްކަތް ނިންމާލުމަށް 3 އަހަރާއި 11 މަސްދުވަސް ހޭދަވިއެވެ. ބުރިޖުގެ މަޝްރޫއަށް ގާތްގަނޑަކަށް 200 މިލިޔަނަށްވުރެ ގިނަ ޑޮލަރު ޚަރަދުކޮށްފައި ވެއެވެ.