އިންޒާރުތަކަކާ ގުޅިގެން ބަނގުލަދޭޝްގެ ގާނޫނު ހަދާ މަޖިލިސް އަންގާރަ ދުވަހު އުވާލައިފިއެވެ. މަޖިލިސް އުވާލުމަށްފަހު، ރިޔާސީ ގަނޑުވަރުން ވަނީ އެކަން އިއުލާން ވެސް ކޮށްފައެވެ.

ބަނގުލަދޭޝްގެ ގާނޫނު ހަދާ މަޖިލިސް އުވާލުމުގެ އިންޒާރު ދީފައިވަނީ، އެ ގައުމުގައި މިހާރު ކުރިޔަށްދާ މުޒާހަރާ އިންތިޒާމު ކުރުމުގައި އިސްކޮށް ހަރަކާތްތެރިވަމުން އަންނަ، ނާހިދު އަލް-އިސްލާމް ފޭސްބުކްގައި ޝާއިޢުކުރި ޕޯސްޓެއްގައެވެ. މުޒާހަރާތައް އިންތިޒާމު ކުރުމުގައި އިސްކޮށް ހަރަކާތްތެރިވި އިތުރު ތިން މީހުންނާ އެކު އޭނާ ފޭސްބުކްގައި ޝާއިޢު ކޮށްފައިވާ ވީޑިޔޯގައި މަޖިލިސް އުވާލުމަށް ދިނީ އަންގާރަ ދުވަހުގެ މެންދުރުފަހު 3 ޖެހުމާއި ހަމައަށެވެ. އަދި އެކަން ނުކޮށްފި ނަމަ، އެ ކަމާ ދެކޮޅަށް ހަރުކަށި ޕުރޮގުރާމެއް ހިންގަން މުޒާހަރާގެ ބައިވެރިން ތައްޔާރަށް ތިބި ކަމަށް ވެސް އޭނާ ބުނެފައި ވެއެވެ.

ބަނގުލަދޭޝްގެ ގާނޫނު ހަދާ މަޖިލިސް އުވާލާފައި މިވަނީ، އެ ގައުމުގެ ބޮޑުވަޒީރު ކަމުގެ މަޤާމުން ޝައިޚް ހަސީނާ އިސްތިއުފާ ދެއްވާފައިވާތާ އެއް ދުވަސް ފަހުންނެވެ. ޝެއިހް ހަސީނާ އިސްތިއުފާ ދެއްވީ މަހެއްހައި ދުވަހަށް ދެމިގެން ދިޔަ މުޒާހަރާތަކާ ގުޅިގެންނެވެ.

މުޒާހަރާތައް ރޫޅައިލުމަށް ފުލުހުން ބާރުގެ ބޭނުން ކުރުމުން ހިނގި ކުރިމަތިލުންތަކުގައި މަރުވި މީހުންގެ ޢަދަދު 300އަށްވުރެ ގިނައެވެ. އޭގެ ތެރޭގައި ގިނައީ، މުޒާހަރާތަކުގައި ބައިވެރިވި ކޮލެޖުތަކާއި ޔުނިވަރސިޓީތަކުގެ ދަރިވަރުންނެވެ.

ހަސީނާ އިސްތިޢުފާ ދެއްވުމުން ބަންގްލަދޭޝްގެ ހުރިހާ ބާރުތަކެއް ފުރޮޅިގެން ގޮސްފައި ވަނީ އަސްކަރިއްޔާގެ ދަށަށެވެ. އަސްކަރިއްޔާގެ އިސް ކޮމާންޑަރު، ޖެނެރަލް ވާކިރު އަލް-ޒަމާން ވިދާޅުވީ ވަގުތީ ސަރުކާރެއް އެކުލަވައިލުމުގެ މަސައްކަތް ފައްޓަވާފައިވާ ކަމުގައެވެ.