18 ރައްޔިތުންގެ މަޖިލީހުގެ ނައިބު ރައީސް ކަމުގެ މަޤާމު ޢަބްދުއްރަޙީމަށް ނުދެއްވީ ރައީސް ޔާމީނުކަމުގައި، ރައީސް ޔާމީނާއި އެކު ސިޔާސީ މަސައްކަތްތަކުގައި އެންމެ ގާތުން މަސައްކަތް ކުރެއްވި ޢަބުދުއްރަހީމް ޢަބުދުﷲ ވިދާޅުވެއްޖެއެވެ.

އަބްދުއްރަހީމް މިހެން ވިދާޅުވީ، ޕީއެންސީން ރޭ ބޭއްވި ހަރުގެ ޖަލްސާގައި ވާހަކަފުޅު ދައްކަވަމުންނެވެ. ޕީއެންއެފްގެ ޖަލްސާތަކުގައި ރައީސް ޔާމީނުވެސް، ޕީއެންސީގެ ލީޑަރޝިޕަށް އެއްޗެހި ވިދާޅުވަމުން ގެންދަވާއިރު، ރޭ ޕީއެންސީން ބޭއްވި ޖަލްސާގައިވެސް މުޅިންވެސް ފާޑުކިޔުންތަކާއި ތުހުމަތުތަކާއި ރައްދުދިނުންތައް އަމާޒުކޮށްފައި އޮތީ ރައީސް ޔާމީނަށެވެ.

ރޭގެ ޖަލްސާގައި ވާހަކަފުޅު ދައްކަވަމުން ޢަބުދުއްރަހީމް ވިދާޅުވީ އޭނާއަށް ސިޔާސީ ގޮތުން "ލަގާ"އެއް (ލަނޑެއް) ދެއްވި ބޭފުޅަކީ ރައީސް ޔާމީނު ކަމަށެވެ. އެއީ، 18 ވަނަ ރައްޔިތުންގެ މަޖިލީހުގެ ނައިބު ރައީސް ކަމުގެ މަޤާމަށް ޢަބްދުއްރަހީމަށް ދެއްވާނެ ކަމުގައި ވިދާޅުވުމަށްފަހުގައި ނުދެއްވުން ކަމުގައިވެސް އަބުދުއްރަހީމް ވިދާޅުވިއެވެ.

ޢަބުދުއްރަހީމްގެ ވާހަކަފުޅުގައި ރައީސް ޔާމީނަށް ވަރަށް ބޮޑަށް ފާޑު ވިދާޅުވި އިރު، އެމަނިކުފާނާއި އެކު މިހާރު މަސައްކަތް ކުރައްވަމުން ގެންދަވާ، ރައީސް ޔާމީނުގެ އެންމެ ފުރަތަމަ ނައިބު ޑރ. މުޙައްމަދު ޖަމީލު އަޙުމަދަށާއި، ކުރީގެ ޔޫތު މިނިސްޓަރ މުހައްމަދު މަލީޙް ޖަމާލަށް ވަރަށް ބޮޑަށް ފާޑުވިދާޅުވެފައެވެ.

އަދި މިއަދު ހިނިއަޔަސް ރުޅިއަޔަށް، ދިވެހިރާއްޖޭގެ ރައްޔިތުންގެ މަޖިލީހުގެ ރައީސަކީ އޭނާ ކަމުގައި، ފަޚުރުވެރިކަމާއި އެކު ޕޯޑިއަމްގައި އަތުންޖައްސަވަމުން އަބްދުއްރަޙީމް ވިދާޅުވިއެވެ. 

އަބްދުއްރަހީމްގެ ވާހަކަފުޅުގައި ވަނީ، ރައީސް ޔާމީން ޢަބުދުއްރަހީމްގެ މައްޗަށް ތުހުމަތު ކުރެއްވި ކޮރަޕްޝަންގެ މައްސަަލަތަކަށްވެސް ރައްދު ދެއްވާފައެވެ. އަދި ޢަބުދުއްރަހީމް ވަނީ، އޭނާގެ ކޮރަޕްޝަންގެ މައްސަލަތައް ބެލުމަށް ކޮމިޓިއެއް ހައްދަވައި އެކޮމިޓީގެ ޗެއާއަކަށް ރައީސް ޔާމީނު ލެއްވުމަށް ރައީސް ޑރ. މުޙައްމަދު މުޢިއްޒަށް ގޮވާލައްވާ ކަމުގައި ވިދާޅުވެފައެވެ.

ޕީއެންސީއަށް ވެރިކަން ލިބި ވެރިކަމުގެ ބާރުތައް ޑރ. މުއިއްޒުގެ އަތްޕުޅަށް ލިބިވަޑައިގެންނެވުމާއި އެކު ކުރިން ރައީސް ޔާމީނާއި އެކު ތިއްބެވި ސިޔާސީ ފަރާތްތަކުން ވަނީ، އެމަނިކުފާނުގެ ދުޝްނަމަނުންގެ ގޮތުގައި މަސައްކަތްކުރަން ފައްޓަވާފައި ކަމުގައި، ޕީއެންއެފްގެ އިސްބޭފުޅުން ވަނީ ވިދާޅުވެފައެވެ. އަދި ޕީއެންއެފްގެ ޖަލްސާތަކުގައި ސަރުކާރަށް ކުރާ ތުހުމަތުތަކަށް ރައްދުދީ، ޕީއެންސީއިންވެސް ވަނީ ޖަލްސާތައް ބާއްވަން ފަށާފައެވެ.