މިހާރު އަމަލުކުރަމުންދާ ގާނޫނުއަސީ އަކީ ފުރިހަމަ ރިޔާސީ ނިޒާމެއް ހިންގުމަށް ކަމުދާ ހުރިހާ ސިފައެއް އެކުލެވޭ ނިޒާމެއް ކަމަށާއި، މިހާރު ދިމާވެގެން އުޅޭ މައްސަލައަކީ، ވެރިކަމުގައި ހުންނަ މީހަކު އެމީހެއްގެ އަތްމައްޗަށް މުޅި ހުރިހާ ބާރެއް ނަގަން އުޅުމުގެ މައްސަލަކަމުގައި، ޤާނޫނު އަސާސީ އެކުލަވާލި ރައްޔިތުންގެ ޚާއްޞަ މަޖިލީހުގެ މެމްބަރު ކަމާއި، ރައްޔިތުންގެ މަޖިލީހުގެ މެމްބަރުކަންވެސް ކުރައްވާފައިވާ، ކުރީގެ މެމްބަރު ރިޔާޒު ރަޝީދު ވިދާޅުވެއްޖެއެވެ.

ރިޔާޒު މިހެން ވިދާޅުވީ، ޤާނޫނު އަސާސީއަށް މިސަރުކާރުން ބައެއް ބަދަލުތައް ގެންނަން އުޅޭ ދަނޑިވަޅެއްގައި އެކަމާއި ގުޅޭ ގޮތުން އެކްސްގައި ލިޔުއްވި ޕޯސްޓެއްގައެވެ.

ޤާނޫނު އަސާސީ އާއި ގުޅޭ ދިރާސާތައް ކުރެއްވުމުގެ މަސައްކަތް ކުރައްވަމުން ގެންދަވާ ކުރީގެ ބަންޑާރަ ނައިބު އައިޝަތު އާޒިމާ ޝަކޫރަށް ފާޑު ވިދާޅުވެ، ރިޔާޒު ރަޝީދު ވިދާޅުވީ،  ފެހި ޤާނޫނު އަސާސީގައި އުނިކަންކަން ހުރިކަމަށް ވިދާޅުވެ، ދިރާސާ ހައްދަވަމުން ގެންދަވާ އާޒިމާ އަކީ ޤާނޫނު އަސާސީގެ ބާރުކަނޑުވާލަން ކުރީގެ ސްޕްރީމް ކޯޓަށް ދަންވަރުވަދެ ގައިރުގާނޫނީ އަމުރު ނެރުމުގެ މޭސްތެރިޔާ ކަމަށެވެ. އަދި އާޒިމާގެ ބަންޑާރަ ނާއިބު ކަމުގަ މިޤާނޫނު އަސާސީ އާއި ޚިލާފަށް ގިނަކަންކަން ކޮށްފައިވާ ކަމަށާއި، އަދިވެސް ފެންނަމުން ދަނީ އެފަދަ ކަންކަމަށް މަގުކޮށާ މަންޒަރު ކަމުގައި ރިޔާޒު ވަނީ ވިދާޅުވެފައެވެ.

ނިމިގެންދިޔަ ރައްޔިތުންގެ މަޖިލީހުގެ އިންތިޚާބުގެ ނަތީޖާއަށް އިޝާރާތް ކުރައްވައި، ރިޔާޒު ވިދާޅުވީ، 28 މޭއި 2024 ދުވަހުން ފެށިގެން މިހާރު މިފެންނަނީ ރާއްޖޭގަ ބަރުލަމާނީ ސިފަޖެހިފަވާ ނިޒާމެއްގަ ވެރިކަންކުރާ މަންޒަރު ކަމަށެވެ.

ނިމިދިޔަ ރައްޔިތުންގެ މަޖިލީހުގެ އިންތިޚާބުގައި ވިލުފުށީ ދާއިރާގެ ގޮނޑިއަށް ވާދަކުރައްވައި ރިޔާޒަށް ނާކާމިޔާބީއާ ކުރިމަތިވިއެވެ. އެ އިންތިޚާބުގައި 76 ގޮނޑި ކާމިޔާބުކޮށް ވެރިކަން ކުރާ ޕާޓީ، ޕީއެންސީން ވަނީ ރައްޔިތުންގެ މަޖިލީހުގެ ސުޕަމެޖޯރިޓީ ހޯދާފައެވެ.