ދިވެހިރާއްޖޭގެ ގައުމީ އެއާރލައިން، މޯލްޑިވިއަން އިން ބަނގުލަދޭޝްގެ ޑާކާއަށް ކުރަމުން އައި ދަތުރުތައް ވަގުތީ ގޮތުން މެދުކަނޑާލައިފިއެވެ.

މޯލްޑިވިއަން އިން ހާމަކޮށްފައިވާ ގޮތުގައި ޑާކާއަށް ކުރާ ދަތުރުތައް މެދުކަނޑާލީ މިއަދުން ފެށިގެންނެވެ. އަދި އަލުން ދަތުރުތައް ފަށާނެ ދުވަހެއް ފަހުން އިއުލާންކުރާނެކަމަށް ވެސް ބުނެފައިވެއެވެ.

މޯލްޑިވިއަން އިން ބަންގްލަދޭޝްއަށް ކުރަމުންދިޔަ ދަތުރުތައް މެދުކަނޑާލީ އެޤައުމުގައި ހިނގަމުންދާ ހަމަނުޖެހުންތަކާއި ގުޅިގެންނެވެ. މި ހަމަނުޖެހުންތަކާ ގުޅިގެން، ބަނގުލަދޭޝްގެ ބޮޑުވަޒީރު ޝައިޚް ހަސީނާ މަޤާމުން އިސްތިއުފާ ދެއްވައި ވެރިރަށް ޑާކާ ދޫކުރައްވައި ވަނީ ވަޑައިގަންނަވާފައެވެ.

މޯލްޑިވިއަން އިން ބަނގުލަދޭޝްއަށް ސީދާ ދަތުރުތައް ކުރަން ފެށީ 15 ނޮވެމްބަރު 2012 ގައެވެ.