ބަނގުލަދޭޝްގެ ޤައުމީ ކްރިކެޓް ޓީމުގެ ކުރީގެ ކެޕްޓަން އަދި މިހާރުވެސް ޤައުމީ ޓީމުގައި ހިމެނޭ ކުޅުންތެރިޔާ ލިޓަން ދާސް، އަދި ބަނގުލަދޭޝްގެ ޤައުމީ ކްރިކެޓް ޓީމުގެ ކުރީގެ ކެޕްޓަން، މިހާރުގެ މަޖިލިސް މެމްބަރު މަޝްރަފޭ ބިން މޯޓާޒާ ގޭގައި ރޯކޮށްއަންދާލައިފިއެވެ.

މީޑިއާތަކުން ރިޕޯޓްކޮށްފައިވާ ގޮތުގައި، ބަނގުލަދޭޝްގެ ބޮޑު ވަޒީރުގެ މަޤާމުން ޝައިޚް ހަސީނާ އިސްތިއުފާ ދެއްވުމަށްފަހު، އެގައުމުގައި ދިރިއުޅޭ ބައި މަދު ހިންދޫންނަށާއި، ޝައިޚް ހަސީނާގެ ޕާޓީ އަވާމީ ލީގުގެ މެމްބަރުންނަށް އަމާޒުކޮށް ހަމަލާތައް ދޭން ވަނީ ފަށާފައެވެ. މިގޮތުން އަވާމީ ލީގުގެ އޮފީސްތަކަށާއި، ހިންދީންގެ ފައްޅިތަކާއި ގެދޮރަށާއި މުދަލަށް ދަނީ ހަމަލާތައް ދެމުންނެވެ. 

ބަނގުލަދޭޝްގެ ޤައުމީ ކްރިކެޓް ޓީމުގެ ކުރީގެ ކެޕްޓަން އަދި މިހާރުވެސް ޤައުމީ ޓީމުގައި ހިމެނޭ ކުޅުންތެރިޔާ ލިޓަން ދާސްއަކީ، ހިންދޫއެކެވެ. އަދި ބަނގުލަދޭޝްގެ ޤައުމީ ކްރިކެޓް ޓީމުގެ ކުރީގެ ކެޕްޓަން، މިހާރުގެ މަޖިލިސް މެމްބަރު މަޝްރަފޭ ބިން މޯޓާޒާއަކީ، މިއަހަރުގެ ޖެނުއަރީ މަހު ނާރައިލް ދާއިރާގެ މަޖިލީހުގެ ގޮނޑި ކާމިޔާބު ކުރެއްވި އަވާމީ ލީގުގެ މެމްބަރެކެވެ.

ބަނގުލަދޭޝްގެ ބޮޑުވަޒީރުކަމުގެ މަޤާމުން ޝައިޚް ހަސީނާ އިސްތިއުފާ ދެއްވުމަށްފަހުގައި، އަވާމީ ލީގުގެ އިތުރުން، ޝައިޚް ހަސީނާ އާއި ގުޅުންހުރި ތަންތަނާއި ތަކެއްޗަށްވެސް އަންނަނީ ގެއްލުންތައް ދެމުންނެވެ. މިގޮތުން ވެރިރަށް ޑާާކާގައި ހުރި، ބަނގުލަދޭޝްގެ މިނިވަންކަމުގެ ބާނީ، ޝައިޚް މުޖީބުއްރަޙްމާގެ މޮނިއުމެންޓް ބުދާއި، ސަރުކާރުގެ އިދާރާތަކާއި އޮފީސްތަކުގައި ހުރި ޝައިޚް ހަސީނާގެ ފޮޓޯފުޅުަތައް އަސްކަރިއްޔާގެ ބައިވެރިވުމާއި އެކު، ވަނީ ހަލާކުކޮށް ނައްތާލާފައެވެ.