ބަނގުލަދޭޝްގެ ބޮޑުވަޒީރުގެ މަޤާމުގައި ހުންނެވި ޝައިޚް ހަސީނާ މަޤާމުން އިސްތިއުފާ ދެއްވައި ޤައުމު ދޫކުރައްވައި ވަޑައިގެންނެވުމާއި އެކު ކުރީގެ ބޮޑު ވަޒީރު ޚާލިދާ ޒިއާ މިނިވަންކޮށްފިއެވެ.

ބަނގުލަދޭޝްގެ މީޑިއާތަކުން ރިޕޯޓްކޮށްފައިވާ ގޮތުގައި، ޚާލިދާ ޒިއާ މިނިވަންކުރެއްވުމުގެ އަމުރު ނެރުއްވީ، ބަނގުލަދޭޝްގެ ރައީސް، މުހައްމަދު ޝަހާބުއްދީންގެ އަމުރުފުޅަށެވެ. ޚާލިދާ ޒިއާއަކީ، ބަނގްލަދޭޝް ނެޝަނަލިސްޓް ޕާޓީ (ބީ.އެން.ޕީ)ގެ ޗެއާ ޕަރސަންއެވެ. 

އުމުރުފުޅުން މިހާރު 78 އަހަރުފުޅުވެފައިވާ ބޭގަމް ޚާލިދާ ޒިއާ، 2018 ވަނަ އަހަރު ވަނީ 17 އަހަރަށް ޖަލަށްލާފައެވެ. އެހެން ނަމަވެސް އެކަމަނާގެ ސިއްޙީ ހާލުކޮޅު ގޯސްކަމުން ހޮސްޕިޓަލުގައި އައީ ފަރުވާދެމުންނެވެ. 

ބޭގަމް ޚާލިދާ ޒިއާގެ އިތުރުން، ބަނގުލަދޭޝްގެ ދަރިވަރުން ފެށީ މުޒާހަރާތަކުގައި މިހާތަނަށް ހައްޔަރުކޮށްފައިވާ އެންމެން މިނިވަންކޮށް ދޫކޮށްލުމަށްވެސް ވަނީ ނިންމަވާފައެވެ. ބަނގުލަދޭޝްގެ ރައީސް، މުހައްމަދު ޝަހާބުއްދީން މި ނިންމެވުންތައް ނިންމަވާފައި ވަނީ، ބަނގުލަދޭޝްގެ ވެރިކަމުގެ ބާރުތައް މިހާރު ނަގާފައިވާ އަސްކަރިއްޔާގެ ވެރިޔާ، ވާކަރުއްޒަމާން އާއި، އަސްކަރިއްޔާގެ އެހެންވެރިންނާއި، ބަނގްލަދޭޝް ނެޝަނަލިސްޓް ޕާޓީގެ އިތުރުން އެޕާޓީ އާއި ގުޅިފައިވާ ޖަމާޢަތޭ އިސްލާމީ ޕާޓީގެ މެމްބަރުންނާއި އެކު ބޭއްވެވި ބައްދަލު ކުރެއްވުމަށްފަހުގައެވެ.

ބަނގުލަދޭޝްގެ ބޮޑުވަޒީރު ކަމުގެ މަޤާމުން ޝައިޚް ހަސީނާ އިސްތިއުފާ ދެއްވާފައި ވަނީ، މަހެއްހައި ދުވަހަށް ދެމިގެން ދިޔަ މުޒާހަރާތަަކަށް ފަހުގައެވެ. އިއްޔެއަކީ އެ މުޒާހަރާތަކުގައި އެންމެ ލޭ އޮހޮރުވުން ބޮޑުވި ދުވަހެވެ. އިއްޔެ އެކަނިވެސް ސަލާމަތީ ޚިދުމަތްތަކާއި އާއްމުންނާއި ދެމެދު ހިނގި ކުރިމަތިލުންތަކުގައި 100 ވުރެ ގިނަ މީހުން މަރުވިއެވެ. އޭގެ ތެރޭގައި 30 ވުރެ ގިނަ ފުލުހުންވެސް ހިމެނެއެވެ.