މިއަދު ބޭއްވި ރައްޔިތުންގެ މަޖިލީހުގެ ޖަލްސާ ފަށައިގެން ކުރިޔަށް ގެންދިޔުމަށް ރައްޔިތުންގެ މަޖިލީހުގެ ކާށިދާު ދާއިރާގެ މެމްބަރު ޢަބުދުﷲ ޖާބިރު ހުރަސް އެޅުއްވުމުން އޭނާގެ ނަން އިއްވައި މަޖިލީހުގެ ތަޅުމުން ބޭރަށް ލައްވައިފިއެވެ.

ރައްޔިތުން މަޖިލީހުގެ ރައީސް މުހައްމަދު ނަޝީދު ޖަލްސާ ފެއްޓެވިކަން އިޢުލާނު ކުރެއްވުމާއި އެކު މެމްބަރު ޖާބިރު ވަނީ، ރިޔާސަތުގެ މޭޒު ކައިރިއަށް ގޮސް، ރިޔާސަތަށް އަދި ރައީސް ނަޝީދަށް އެއްޗެހިކިޔުއްވާފައެވެ.

ޖާބިރު ކޯފާވެގެން އުޅުއްވީ ކޮންކަމަކާ ކަމެއް އެނގިފައެއް ނުވެއެވެ. އެހެން ނަމަވެސް އެހެން ދުވަސް ދުވަހާއި ޚިލާފަށް ޖާބިރު ހުންނެވީ ވަރަށް ބޮޑަށް ކޯފާ އިސްކުރައްވާފައެވެ. އާއްމު ގޮތެއްގައިވެސް މެމްބަރު ޖާބިރަކީ މިހާރު މަޖިލީހުގެ އިދާރީ ނިޒާމަށް ހުރަސް އަޅުއްވައި ވާހަކަފުޅު ދައްކަވައެވެ. މަޖިލީހުގެ ރިޔާސަތުން ވަނީ މިއަދު މެމްބަރު ޖާބިރުގެ ނަން އިއްވުމަށްފަހު، ތަޅުމުން ބޭރަށް ނުކުންނެވުމަށް އަންގަވާފައެވެ. އަދި އެމަނިކުފާނު ނުކުންނަވަންދެން ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވަނީ މަޖިލީހުގެ ޖަލްސާ މެދު ކަނޑުއްވާލައްވާފައެވެ. އަލުން ޖަލްސާ ފެއްޓެވީ ޖާބިރު މަޖިލީހުގެ ތަޅުމުން ނެރުއްވުމަށް ފަހުގައެވެ.

މިއަދު އޮތް ރައްޔިތުންގެ މަޖިލީހުގެ ޖަލްސާގައި އޮތީ، ރައްޔިތުންގެ މަޖިލީހު އުނގޫފާރުދާއިރާގެ މެމްބަރު އިބްރާހީމް ވަހީދު، މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އާމިނަތު ޝައުނާ އާއި ސުވާލު ކުރެއްވުމާއި، ބައެއް ޤަރާރުތަކުގެ މަސައްކަތްތަކާއި، ކޮމިޓީ ރިޕޯޓްތަކަށް ބަހުސް ކުރެއްވުމެވެ.