މަހަކަށް ވުރެ ގިނަ ދުވަހަށް ދިގު ދެމިގެންދިޔަ މުޒާހަރާތަކަށް ފަހު ބަނގުލަދޭޝްގެ ބޮޑުވަޒީރު ޝައިޚް ހަސީނާ މަޤާމުން އިސްތިއުފާ ދެއްވައި ޤައުމު ދޫކުރައްވައި ވަޑައިގެންނެވުމާއި އެކު، މުޒާހަރާކުރި މީހުން ހަސީނާގެ ގެކޮޅަށް ވަދެ އެ ގެކޮޅުގައި ހުރި މުދަލާއި ބައެއް ތަކެތި ލޫޓުވާލައިފިއެވެ.

ބަނގުލަދޭޝްގެ އަސްކަރިއްޔާއިން ވަނީ، މުޒާހަރާގައި ބައިވެރިވި މީހުން، ހަސީނާގެ ގެކޮޅަށް ވަދެ ގަތުމަށް ކުރި މަސައްކަތްތައް ނުހުއްޓުވައި ދޫކޮށްލާފައެވެ. އެގެކޮޅުގެ ތެރެއަށް ވަދެގަތް އާއްމުން ވަނީ، ހަސީނާ ނިދިކުރައްވާ އެނދުމަތީގައި ފޮޓޯތައް ނަގައި އާއްމުކޮށްފައެވެ. މީގެ އިތުރުން އެ ގެކޮޅުގައި މިއަދުގެ މެންދުރުގެ ފަރިއްކޮޅަށް ތައްޔާރުކޮށްފައި ހުރި ބައެއް ކާބޯތަކެތިވެސް އާއްމުން ކާ މަންޒަރު ފެންނަ ވީޑިއޯތައް ސޯޝަލްމީޑިއާގައި ދައުރުވެފައިވެއެވެ.

މުޒާހަރާގެ އާއްމުން އެގެކޮޅަށް ވަދެ ގެއްލުންދީ ލޫޓުވުން ހުއްޓުވުމަށް ބަނގުލަދޭޝް އަސްކަރިއްޔާއިން އެއްވެސް މަސައްކަތެއް ކޮށްފައެއް ނުވެއެވެ. މުޒާހަރާގެ ބައިވެރިން ވަނީ، އެގެކޮޅުގައި ހުރި ފަރުނީޗަރާއި ހިފާ ގެންގުޅޭ ސާމާނާއި، ޝައިޚް ހަސީނާގެ އަންނައުނާއި، އަދި އެތެރެއިން ލުމަށް ބޭނުންކުރާ އަންނައުނުތައްވެސް ލޫޓުވައިގެން ގެންގޮސްފައެވެ.

ބަނގުލަދޭޝްގެ އަސްކަރިއްޔާއިން ވަނީ އެޤައުމުގެ ކޮންޓްރޯލް ނަގައި ވަގުތީ އެއްބައިވަންތަކަމުގެ ސަރުކާރެއް އެކުލަވާލާނެ ކަމަށް ބުނެފައެވެ.

ރިޕޯޓްތައް ބުނާ ގޮތުގައި ޝައިޚް ހަސީނާ މިވަގުތު ހުންނެވީ އިންޑިއާގައެވެ.