ހަމަނުޖެހުންތައް ބޮޑުވެ ބަނގުލަދޭޝްގެ ބޮޑުވަޒީރު ޝައިޚް ހަސީނާ މަޤާމުން އިސްތިއުފާ ދެއްވައި ވެރިރަށް ޑާކާ ދޫކުރައްވައި ފިއްލަވާފައިވާ ކަމުގައި، ބަނގުލަދޭޝްގެ މީޑިއާތަކުން ރިޕޯޓްކޮށްފިއެވެ.

ބައެއް މީޑިއާތަކުން ރިޕޯޓްކޮށްފައިވާ ގޮތުގައި ހަސީނާ ފިއްލަވާފައި ވަނީ، އަސްކަރިއްޔާގެ ހެލިކޮޕްޓަރެއްގައެވެ. އަދި ޑާކާދޫކޮށް ވަޑައިގެންނެވީ ޤައުމުން ބޭރަށް ކަމުގައިވެސް ރިޕޯޓްތައް ބުނެފައިވެއެވެ. ހަސީނާ ގަނޑުވަރު ދޫކުރައްވައި ފިއްލެވީ، މުޒާހަރާ ކުރަމުންދާ އާއްމުން ސަލާމަތީ ސަފުތައް ފޫއަޅުވާލައި، ހަސީނާ ދިރިއުޅުއްވަމުން ގެންދަވާ ރަސްމީ ގެކޮޅަށް ވަދެގަތުމުންނެވެ. 

ދުނިޔޭގެ އެންމެ ފަޤީރު ޤައުމުތަކުގެ ތެރޭގައި ހިމެނޭ ބަނގުލަދޭޝްގައި މިދިޔަ މަހު މުޒާހަރާތައް ފެށުނީ، އެޤައުމުގެ ސަރުކާރުގެ ވަޒީފާތައް ދިނުމުގައި، އެޤައުމަށް މިނިވަންކަން ހޯދުމުގައި މަސައްކަތްކުރެއްވި ފަރާތްތަކުގެ އާއިލާތަކަށް ކޯޓާ ކަނޑައަޅާފައި އޮންނަ މައްސަލައިގައެވެ. 

މުޒާހަރާތަކުގައި އިސްކޮށް ހަރަކާތްތެރިވަމުން އައީ، ބަނގުލަދޭޝްގެ ޔުނިވަސިޓީތަކުގައި ކިޔަވާކުދިންނެވެ. މުޒާހަރާތަކުގައި ހިނގަމުން އައި ހަމަނުޖެހުންތަކުގައި މިހާތަނަށް 300 ވުރެ ގިނަ މީހުން ވަނީ މަރުވެފައެވެ. އޭގެ ތެރޭގައި ފުލުހުންނާއި، އާއްމުންގެ ގިނަ އަދަދެއްގެ ބަޔަކު ހިމެނެއެވެ.

ބަނގުލަދޭޝްއަށް ހަމަޖެހުން ގެނައުމަށާއި ޤައުމީ އެއްބައިވަންތަ ކަމުގެ ސަރުކާރެއް އެކުލަވާލުމަށް މަސައްކަތް ކުރަމުން އަންނަ ކަމުގައި، އަސްކަރިއްޔާއިން ވަނީ ހާމަކޮށްފައެވެ.

ބަނގުލަދޭޝްގެ ވެރިރަށްޑާކާގައި މިއަދު މުޒާހަރާތައް ވަރުގަދަވެފައި ވުމާއިއެކު، ކާފިއު އިއުލާނުކޮށް، ފުލުހުންނާއި ސިފައިން ވަނީ ބާރުގެ ބޭނުންކޮށްގެން ހަމަނުޖެހުންތައް މައިތިރިކުރަން ފަށާފައެވެ.