ގައުމީ އެއާރލައިން، މޯލްޑިވިއަންގެ އެތެރޭގެ އުދުހުންތަކާ ދިމާވާގޮތަށް ރާއްޖެ ޓްރާންސްޕޯޓު ލިންކު (އާރުޓީއެލް)ގެ ދަތުރުތަކަށް ބަދަލު ގެނަސް، ފްލައިޓުން ދަތުރުކުރާ ފަސިންޖަރުންގެ ދަތުރުތައް އިތުރަށް ފުރިހަމަ ކުރުމަށް މަސައްކަތް ކުރަމުން އަންނަ ކަމަށް އައިލެންޑު އެވިއޭޝަނުން ބުނެފިއެވެ.

މި ވިސްނުމާއެކު އެންމެ ފުރަތަމަ މި ބަދަލު ގެނަސްފައިވަނީ ގއ. އަތޮޅު ފެރީއަށެވެ. އެގޮތުން މޯލްޑިވިއަން އިން ގއ. ކޫއްޑޫ އަށް ހެނދުނު ކުރާ ދަތުރުގެ ޝެޑިއުލާ ދިމާވާ ގޮތަށް އާރުޓީއެލްގެ ފެރީ ގަޑި ވަނީ ބަދަލު ކޮށްފައެވެ.

މި ބަދަލާއެކު މާލޭން ހެނދުނު 7:50 ގައި ނައްޓާލާ ފްލައިޓު 8:55ގައި ކޫއްޑޫގައި ޖައްސާއިރު، ކޫއްޑޫ އާއި ވިލިނގިއްޔާ ދެމެދު 9:30ގައި ފެރީ އޮންނާނެއެވެ. އަދި މި ދަތުރުތައް ހަފްތާގެ ހަތް ދުވަހު ވެސް އޮންނާނީ އެހެންކަމަށް އައިލެންޑު އޭވިއޭޝަނުން ހާމަކޮށްފައިވެއެވެ.

ކޫއްޑޫއިން ވިލިގިއްޔަށް އާރުޓީއެލް ފެރީގައި ކުރާ ދަތުރުގެ ދިގު މިނަކީ 10 މިނެޓެވެ.

އެމްޓީސީސީ އިން ފޯރުކޮށްދޭ އާރުޓީއެލް ފެރީގެ ހިދުމަތް މިހާރު އަންނަނީ 4 ސަރަހައްދެއްގައި ދެމުންނެވެ. އެއީ ހއ އަތޮޅާއި، ހދ އަތޮޅާއި އަދި ށ އަތޮޅު ހިމެނޭ ޒޯނާއި، ނ އަތޮޅު ހިމެނޭ ޒޯނާއި، ޅ އަތޮޅު ހިމެނޭ ޒޯނާއި އަދި ގއ އަތޮޅާއި، ގދ އަތޮޅާއި، ފުވައްމުލައް އަދި އައްޑޫ ހިމެނޭ ޒޯނެވެ.