ރައްޔިތުންގެ މަޖިލީހުގެ މިއަދުގެ ޖަލްސާގެ ފުރަތަމަ ދަންފަޅިއަށް އެޖެންޑާ ކުރި ދެ ރިޕޯޓަށް ބަހުސް ކުރާނެ މެންބަރަކު ނެތުމުންނާއި، ފްލެޓު ބަހުސްއަށް ހައުސިން މިނިސްޓަރު ޑރ. އަލީ ހައިދަރު ވަޑައިނުގެންނެވުމުން، 10 މިނެޓު ތެރޭގައި މަޖިލީހުގެ ޖަލްސާ މެދުކަނޑާލައިފިއެވެ.

ދެ ރިޕޯޓަށް ބަހުސް ކުރާނެ މެންބަރަކު ނުވި އިރު، މަޖިލީހަށް މިއަދު ވަޑައިގެންނެވީ ވެސް 50 މެންބަރުންނެވެ. 93 މެންބަރުން ހިމެނޭ މަޖިލީހަށް ބަލިވުމުގެ ސަބަބުން މިއަދު ހާޒިރުވެފައި ނުވަނީ ދެ މެންބަރުންނެވެ. އަނެއް 41 މެންބަރުންނަށް ހާޒިރުނުވެވުނު ސަބަބެއް ހާމަކޮށްފައެއް ނުވެއެވެ.

މަޖިލީހުގައި މިއަދު ފުރަތަމަ އެޖެންޑާ ކޮށްފައި އޮތީ، ހައުސިން މިނިސްޓަރު ޑރ. އަލީ ހައިދަރާ ސުވާލުކުރެއްވުމެވެ. ނަމަވެސް "އާއިލީ، ކުއްލިކަމެއް" ދިމާވެގެން ކަމަށް ވިދާޅުވެ، މިނިސްޓަރ މަޖިލީހަށް ހާޒިރުވެވަޑައިނުގެންނެވުމާ ގުޅިގެން، އެކަން ކުރިޔަށް ގެންދެވޭ ގޮތެއް ނުވިއެވެ.

ހެނދުނުގެ ދަންފަޅިއަށް ދެން ޝެޑިއުލް ކޮށްފައި އޮތީ  ކޮމިއުނިކޭޝަން އޮތޯރިޓީގެ އޮޑިޓު ރިޕޯޓުތައް ދިރާސާކޮށް މާލިއްޔަތު ކޮމިޓީން އެކުލަވައިލި ރިޕޯޓާއި، ފެމިލީ ޕްރޮޓެކްޝަން އޮތޯރިޓީގެ އޮޑިޓު ރިޕޯޓުތައް ދިރާސާކޮށް މާލިއްޔަތު ކޮމިޓީން އެކުލަވައިލި ރިޕޯޓަށް ބަހުސް ކުރުމެވެ.

ނަމަވެސް މި ދެ ރިޕޯޓު މަޖިލީހުގެ ތަޅުމަށް ހުށަހެޅުއްވުމުން، އެ ރިޕޯޓުތަކަށް ބަހުސްކުރަން ރިޔާސަތުން ހުޅުވައިލެއްވި ފުރުސަތު އެއްވެސް މެންބަރަކު ބޭނުމެއް ނުކުރައްވައެވެ. އެހެންކަމުން، މަޖިލީހުގެ ރިޔާސަތުން ރައީސް އަބްދުއްރަހީމް އަބްދުﷲ ނިންމެވީ ޖަލްސާ މެދުކަނޑައިލެއްވުމަށެވެ.

މިއަދުގެ ޖަލްސާގެ ދެވަނަ ދަންފަޅީގައި ވެސް މެންބަރުން ކުރައްވާނެ ބަހުސެއް ނެތެވެ. ހަމަ އެކަނި އޮތް ކަމަކީ، މިއަދުގެ ބަހުސަށް ހުޅުވާލި ދެ ރިޕޯޓު ފާސްކުރުމަށް ވޯޓަށް އެހުމެވެ.