Advertisement
ރައީސުލްޖުމްހޫރިއްޔާގެ ނައިބު ފައިޞަލް ނަސީމް --
ޤައުމީ ތަރައްޤީގެ ލަނޑުދަނޑިތައް ޙާޞިލް ކުރުމުގައި ޒުވާނުން އެއްބައިވުމަށް ނައިބު ރައީސް އެދިވަޑައިގެންފި
ޤައުމީ ތަރައްޤީގެ ލަނޑުދަނޑިތައް ޙާޞިލް ކުރުމުގައި ޒުވާނުން އެކުެވެރިކަމާއި އެއްބައިވަންތަކަމާއި އެކު މަސައްކަތްކޮށްދެއްވުމަށް ރައީސުލް އެދިވަޑައިގެންފިއެވެ.
އެމަނިކުފާނު މިކަމަށް އެދިވަޑައިގެންނެވީ، މިއަދު ފާހަގަކުރާ ދިވެހިރާއްޖޭގެ 59ވަނަ މިނިވަން ދުވަހުގެ މުނާޞަބަތުގައި، އައްޑޫ ސިޓީކައުންސިލުން އިންތިޒާމްކޮށްގެން ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ. މިޖަލްސާ ބާއްވާފައި ވަނީ، މިއަދު ހެނދުނު އައްޑޫ ހައި ސްކޫލުގެ ހޯލުގައެވެ.
މިޖަލްސާގައި ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި ވަނީ، ދިވެހިރާއްޖޭގެ މިނިވަންކަމުގެ ތާރީޚާއި އަދި މިނިވަންކަން ހޯއްަދަަވައި ދެއްވި ބަޠަލުންނާއި އެބޭފުޅުން ކުރެއްވި މަސައްކަތްތަކުގެ މައްޗަށް އަލިއަޅުއްވާ ލައްވާފައެވެ. އަދި މިސަރުކާރުން އެންމެ އިސްކަމެއް ދޭ ކަމަކީ، ޤައުމުގައި ހަމަޖެހުން ޤާއިމްކޮށް ސުލުޙަ މަސަލަސް ކަމާއި އެކު ރައްޔިތުންނަށް ދިރިއުޅެވޭނެ މަގު ފަހިކޮށްދިނުންކަންވެސް އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ. މީގެ އިތުރުން، ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި ޤައުމުގެ ތަރައްޤީ ޙާޞިލުކުރުމުގައި ޒުވާނުން އެކުވެރިކަމާއި އެއްބައިވަންތަކަމާއެކު މަސައްކަތްކޮށްދެއްވުމަށާއި އަދި ކިޔަވާކުދިން މަސައްކަތްތެރިބަޔަކަށްވެ އެކި ރޮނގުތަކުން ޤައުމަށް ޚިދުމަތްކުރާ ބަޔަކަށް ވުމަށް އެދިވަޑައިގެންނެވިއެވެ
މިޖަލްސާގައި ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި ވަނީ، އައްޑު ސިޓީގެ ތަރައްޤިއަށް މިސަރުކާރުން ކުރަމުންދާ މަސައްކަތްތަކުގެ މައްޗަށްވެސް އަލިއަޅުއްވައިލައްވާފައެވެ. އެމަނިކުފާނު ވިދާޅުވީ، ސަރުކާރުން މިހާރު އައްޑޫ ސިޓީގެ ތަރައްޤީއަށް ކުރިޔަށްގެންދާ މަޝްރޫޢުތަކާއެކު އައްޑޫސިޓީއަށް އިންގިލާބީ ބަދަލެއް ބަދަލުތަކެއް އަންނާނެ ކަމަށެވެ.
