ސައުތު އޭޝިއަން އެސޯސިއޭޝަން ފޯ ރީޖަނަލް ކޯޕަރޭޝަން (ސާކް) ގެ ސެކްރެޓަރީ ޖެނެރަލްގެ މަގާމާ މިދިޔަ އޮކްޓޯބަރު މަހު ހަވާލުވެ ވަޑައިގެންނެވި، އެމްޑީ ގޮލަމް ސަރުވާރު މިއަދު ރާއްޖެއަށް ވަޑައިގެންފިއެވެ.

ޚަބަރު ލިބިފައިވާ ގޮތުގައި ސަރުވާރު ރާއްޖެއަށް ވަޑައިގެންނެވީ، ތައާރަފުވެވަޑައިގެންނެވުމުގެ ދަތުރުފުޅެއްގައެވެ. އެގޮތުން މި ދަތުރުފުޅުގައި ރާއްޖޭގެ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއާ ބައްދަލު ކުރެއްވުމަށް ވެސް ވަނީ ހަމަޖެހިފައެވެ.

މީގެ އިތުރުން، ސަރުވާރުގެ މި ދަތުރުފުޅުގައި ފޮރިން މިނިސްޓަރު، މޫސާ ޒަމީރު އާއި، ފޮރިން ސެކްރެޓަރީ، ފާތުމަތު އިނާޔާ އާއި ބައްދަލު ކުރެއްވުމަށް ވެސް ވަނީ ހަމަޖެހިފައެވެ.

ސާކްގެ ސެކްރެޓަރީ ޖެނެރަލްގެ މަގާމަށް އައްޔަނު ކުރުމުގެ ކުރިން ސަރުވާރު ހުންނެވީ ބަނގުލަދޭޝްއިން މެލޭޝިއާއަށް ކަނޑައަޅާފައި ހުންނެވި ހައިކޮމިޝަނަރުގެ މަގާމުގައެވެ. އެބޭފުޅާ ސާކްގެ ސެކްރެޓަރީ ޖެނެރަލްގެ މަގާމަށް އައްޔަން ކޮށްފައިވަނީ 25 އޮކްޓޯބަރ 2023 ގައެވެ.

މި ދަތުރުފުޅު ނިންމަވާލެއްވުމަށްފަހު ސަރުވާރު ރާއްޖެއިން ފުރާވަޑައިގެންނެވުމަށް ހަމަޖެހިފައިވަނީ އޮގަސްޓު 8 ވަނަ ދުވަހުއެވެ. އެބޭފުޅާގެ އަރިހުގައި، އަނބިކަނބަލުން ތަސްލީމާ ސަރުވާރާއި، ސާކްގެ ޑިރެކްޓަރ ޝާހިޔާ އަލީ މަނިކު އަދި ސާކްގެ ސެކްރެޓޭރިއަޓް، ބަވޭޝް އާރު. ޓްރިވެޑީ ވަނީ ބައިވެރިވެވަޑައިގަންނަވާފައެވެ.