މިއަހަރުގެ މިހާތަނަށް އައިރު ދައުލަތުގެ ބެލުމުގެ ދަށުގައި ތިބި 22 ކުޑަކުއްޖަކަށް އެކުދިން އާއިލާތަކާއި ހަވާލުކުރވިފައިވާ ކަމުގައި އާއިލާ އާއި ބެހޭ ވަޒީރު، ޑރ. އައިޝަތު ޝިހާމް ވިދާޅުވެއްޖެއެވެ.

ދައުލަތުގެ މީޑިއާ ޕީއެސްއެމްއިން ގެނެސްދޭ ރާއްޖެ މިއަދު ޕްރޮގްރާމްގައި ބައިވެރިވެވަޑައިގެން ވާހަކަފުޅު ދައްކަވަމުން މިނިސްޓަރ އައިޝަތު ޝިހާމް ވިދާޅުވީ، ދައުލަތުގެ ބެލުމުގެ ދަށުގައި ތިބި ކޮންމެ ކުޑަކުއްޖަކަށްވެސް އާއިލާއެއް ހޯއްދަވައި ދެއްވުމަކީ ސަރުކާރުގެ ވަރަށް މުހިއްމު ޢަމާޒެއް ކަމަށެވެ.

މިނިސްޓަރ ވިދާޅުވީ މިހާރުވެސް އިތުރު 22 ކުއްޖަކު އާއިލާތަކާއި ހަވާލުކުރުމުގެ މަސައްކަތްތައްވެސް ހިނގަމުންދާ ކަމަށެވެ. އަދި އެމަސައްކަތްތައް އޮތީ އެކި މަރުހަލާތަކުގައި ކަން އެކަމަނާ ފާހަގަކުރެއްވިއެވެ.

މިނިސްޓަރ ޑރ. އައިޝަތު ޝިހާމް ވިދާޅުވީ، އެކަމަނާ އުއްމީދު ކުރައްވަނީ މުޖުތަމައުގެ ތެރެއިން ގިނަ ބަޔަކު، ކުދިން ބަލައިގަނެ، އަދި އެކުދިން ގެންގޮސްގެން ރަނގަޅަށް ބަލަަހައްޓައި ދޭނެ ކަމަށެވެ. 

މިނިސްޓަރ ވިދާޅުވީ، އަތޮޅުތަކާއި މާލޭގައި ހުރި ކުޑަކުދިން ބަލަހައްޓާ ދައުލަތުގެ މަރުކަޒުތަކުގައި މިހާރުވެސް 167 ކުދިން އެބަތިބި ކަމަށެވެ.