ފްރާންސްގެ ޕެރިހުގައި މިހާރު ކުރިޔަސްދާ އޮލިމްޕިކްސް ގޭމްސްގައި ފިރިހެނުންގެ 50 މީޓަރ ފްރީސްޓައިލް އިވެންޓުގެ ޤައުމީ ރެކޯޑު، މުޙައްމަދު އާން ޙުސައިން އާކޮށްފިއެވެ. އުމުރުން 19 އަހަރުގެ އާން މި ރެކޯޑު އާކޮށްފައިވަނީ 00:24.22 ސިކުންތުން ރޭސް ނިންމައިގެންނެވެ.

މި ޓައިމިންގ އާއެކު އޭނާވަނީ ވާދަކުރި ހީޓުގެ ތިންވަނަ ވެސް ހޯދާފައެވެ. ޖުމްލަ 8 އެތުލީޓުން ހިމެނޭ މި ހީޓުގެ އެއް ވަނަ ހޯދީ ސްވިޒަލޭންޑުގެ ތިއަރީ ބޮލިންއެވެ. އަދި ދެވަނަ ހޯދީ ބުރުނޑީގެ ބެލީ-ކްރެސަސް ގަނީރާއެވެ. ބޮލިން 22.95 ސިކުންތުން ރޭސް ނިންމި އިރު ގަނީރާ ރޭސް ނިންމީ 23.80 ސިކުންތުންނެވެ.

50  މީޓަރ ފްރީސްޓައިލް އިވެންޓުގެ ގައުމީ ރެކޯޑް ކުރިން ވެސް އޮތީ އާންގެ އަތުގައެވެ. އެއީ މި އަހަރުގެ މެއި މަހު މެލޭޝިއާގައި ކުރިއަށްދިޔަ މުބާރާތުގައި 24.28 ސިކުންތުން ރޭސް ނިންމައިގެންނެވެ.

އޮލިމްޕިކްސްގައި ރާއްޖޭން ދެން ވާދަކުރާ އެތުލީޓަކީ، އައިޝަތު އުލްޔާ ޝާއިގު އެވެ. އުލްޔާގެ އިވެންޓް އޮތީ މިއަދުއެވެ. އޭނާ ވާދަކުރަން ހަމަޖެހިފައިވަނީ އަންހެނުންގެ 50 މީޓަރު ފްރީސްޓައިލް އިވެންޓުގައެވެ.