ދިވެހިރާއްޖޭގެ މިނިވަން ދުވަހާއި ގުޅިގެން ކޮންމެ އަހަރަކުވެސް ބާއްވަމުން އަންނަ ދިވެހި ސިފައިންގެ މަގުމަތީ ހިނގާލުން މިއަދާއި މާދަމާ އޮންނާނެ ކަމުގައި، އެމްއެންޑީއެފުން ވިދާޅުވެއްޖެއެވެ.

އެމްއެންޑީއެފުން ވިދާޅުވީ، މަގުމަތީ ހިނގާލުން މާލޭގައި ބޭއްވުމަށް ހަމަޖައްސާފައި ވަނީ މިއަދު ހަވީރު ކަމަށާއި، މިހިނގާލުން ހުޅުމާލޭގައި ބޭއްވުމަށް ހަމަޖައްސާފައި ވަނީ، މާދަމާ ކަމަށެވެ.

މި ދެދުވަހުވެސް ހިނގާލުން ފެށުމަށް ހަމަޖައްސާފައި ވަނީ، ހަވީރު 4:15 ގައެވެ.

މާލޭގައި ހިނގާލުން ފަށާނީ، ބަންޑާރަ ކޮށިންނެވެ. އަދި ހިނގާލުން ނިންމާނީ ކަޅުތުއްކަލާކޮއްޓަށެވެ. މިހިގާލުމުގައި ސިފައިން ދަތުރުކުރާނީ، ބަންޑާރަކޮށިން ނުކުމެ، އަމީރު އަހުމަދުން އިރަށް ގޮސް ސޯސަން މަގުން ދެކުނަށް ގޮސް މަޖީދީ މަގުން ހުޅަނގަށް ގޮސް، ކަނބާއައިސާ ރަނި ހިނގުމުން ދެކުނަށް ގޮސް، އަމީނީ މަގުން އިރަށް ގޮސް, ބޮޑުތަކުރުފާނު މަގުން ދެކުނަށް ގޮސް ކަޅުތުއްކަލާ ކޮއްޓާއި ހަމައަށެވެ.

މާލޭގައި ބާއްވާ ހިނގާލުމުގައި ބައިވެރިން، ފަސް ސަރަހައްދަކަށް މަޑު ކުރާނެއެވެ. މިގޮތުން ހިނގާލުމުގެ ބައިވެރިން މަޑުކުރާނެ ސަރަހައްދުތަަކީ، އަމީރުއަހުމަދު މަގު ޕާކިން ޒޯން (ރައީސް އޮފީސް ފުރަގަސް) ކުރިމަތި، ސޯސަން މަގު ދިވެހި ބަހުގެ އެކަޑަމީ ކުރިމަތި. މަޖީދީ މަގާއި ޗާނދަނީ މަގު ގުޅޭ ހަތަރު އަނގޮޅި، އަދި މަޖީދީމަގާއި އިއްޒުއްދީން މަގު ގުޅޭ ހަތަރު އަނގޮޅީގެ އިތުރުން، ބޮޑުތަކުުރުފާނު މަގުން، ކަޅުތުއްކަލާ ކޮށީގެ ހުޅަނގު އުތުރު ކަންމައްޗެވެ.

ހޮނިހިރު ދުވަހު ހުޅުމާލޭގައި ބާއްވާ ހިނގާލުން ފަށާނީ، ހުޅުމާލޭގައި ކޯސްޓްގާޑުގެ އުޅަނދުތައް އަޅާފައިވާ ސަރަހައްދުގެ ބަނދަރުމަތިންނެވެ. އަދި ހިނގާލުން ނިންމާނީ، ހުޅުމާލޭ ސްޓެލްކޯ އިންޖީނުގެ ކައިރީގައި ހުންނަ، ހުޅުމާލެ ސިފައިންގެ މަރުކަޒަށެެވެ.

ހުޅުމާލޭގައި ބާއްވާ ހިނގާލުމުގައި ސިފައިން 3 ސަރަހައްދެއްގައި މަޑު ކުރާނެއެވެ. އެއީ ހުޅުމާލެ ސެންޓްރަލް ޕާކުގެ އުތުރުފަރާތު މައިގޭޓު ކުރިމަތިން ވަން ސެންޓްރަލްޕާކް ބިލްޑިންގ ކައިރީގަޔާއި، ސެންޓްރަލް ޕާކަށް ވަންނަ އިރުމަތީ ގޭޓު ކުރިމަތީގަޔާއި، ސިފައިންގެ ފްލެޓް އިމާރާތްތަކުގެ ކައިރިން، ހުޅުމާލެ ރީތި ގަސްމަގާއި، އަސުރުމާ ހިނގުން ގުޅޭ ހަތަރު އަނގޮޅިއެވެ.

ސިފައިން ބާއްވާ މަގުމަތީ ހިނގާލުމުގައި ދިވެހި ސިފައިންގެ ބޭންޑުން ރާގުތައް ކުޅޭނެއެވެ.