ރާއްޖޭގައި ސިންގަލް ޔޫސް ޕްލާސްޓިކް މަނާކުރުމުގެ ގޮތުން އެކުލަވާލި ލިސްޓުގައި ހިމެނޭ ބާވަތްތަކުގެ ތެރެއިން، 500 އެމްއެލް ކުދި ޕްލާސްޓިކް ފުޅީގައި ފެން ބަންދުކޮށް ވިއްކުން މަނާކުރުން ދެވަނަ ފަހަރަށް ސަރުކާރުން ފަސްކޮށްފިއެވެ.

މީގެ ކުރިން ނިމިދިޔަ ސަރުކާރުގައިވެސް ވަނީ، 500 އެމްއެލް ޕްލާސްޓިކް ކުދި ފުޅި މަނާކުރާ ތާރީޚު ފަސްކޮށްފައެވެ. ސިންގަލް ޔޫސް ޕްލާސްޓިކްގެ ސަބަބުން ތިމާވެއްޓަށް ލިބޭ ގެއްލުންތައް ކުޑަކުރުމަށް، 14 ބާވަތެއްގެ ޕްލާސްޓިކްގެ ބާވަތްތައް ރާއްޖޭގައި މަނާކުރުމަށް ނިންމާފައިވެއެވެ. އޭގެ ތެރޭގައި އެއްފަހަރު ބޭނުންކޮށްފައި އުކާލެވޭ ގޮތަށް ތައްޔާރުކޮށްފައި ހުންނަ 500 އެމްއެލްގެ ޕްލާސްޓިކް ކުދި ފެންފުޅިވެސް ހިމެނެއެވެ.

ރައީސުލްޖުމްހޫރިއްޔާ ބުދަ ދުވަހު ނެރުއްވުި ޤަރާރުގައިވާ ގޮތުން، 500 އެމްއެލްގެ ޕްލާސްޓިކް ކުދި ފެންފުޅިއާއި އަދި 1 ލީޓަރުގެ ކުދި ފެންފުޅި ރާއްޖެއަށް އެތެރެ ކުރުމާއި، އުފެއްދުން މަނާކުރުމަށް މިހާރު ކަނޑައަޅާފައިވާ ތާރީޚަކީ، 1 ޑިސެމްބަރު 2025 އެވެ. އަދި އެބާވަތްތައް ރާއްޖޭގެ ބާޒާރަށް ނެރެ ވިއްކުން މަނާކުރުމަށް ކަނޑައަޅާފައިވާ ތާރީޚަކީ، 1 މާރިޗު 2026 އެވެ.

ތިމާވެއްޓަށް ގެއްލުންދޭ އެއްފަހަރު ބޭނުންކޮށްފައި އުކާލެވޭ ތަކެތީގެ ތެރެއިން، ރާއްޖެއަށް އެތެރެކުރުމާއި އުފެއްދުމާއި ބޭނުންކުރުން މަނާކޮށްފައިވާ ލިސްޓުގައި ހިމެނޭ 14 ބާވަތުގެ ތެރެއިން ޕްލާސްޓިކް ފެންފުޅި ފިޔަވައި އެހެން ހުރިހާ ބާވަތެއް ވަނީ މަނާކޮށްފައެވެ.

ފެނާއި އެހެނިހެން ތައްޔާރީ ބުއިންތައް ބަންދުކޮށްފައި ހުންނަ، 500 މިލި ލީޓަރަަށްވުރެ ކުދި ޕްލާސްޓިކް ފުޅި ރާއްޖެއަށް އެތެރެކުރުމާއި އުފެއްދުމާއި ބާޒާރަށް ނެރުން 2023 ވަނަ އަހަރުން ފެށިގެން ވަނީ މުޅިން މަނާކޮށްފައެވެ.