އިޒްރޭލުގެ ޖާސޫސީ އިދާރާ މޮސާޑުން އީރާންގެ ވެރިރަށް ތެހެރާންގެ ތެރޭގައި، ރާވައި ހިންގި ކަމަށް ބެލެވޭ ބަޑީގެ ހަމަލާތަކެއްގައި، ޙަމާސްގެ ސިޔާސީ ގޮފީގެ އިސްވެރިޔާ އިސްމާއީލް ހަނިއްޔާ އަވަހާރަކޮށްލައިފިއެވެ.

ހަނިއްޔާ އަވަހާރަކޮށްލާފައި ވަނީ، އީރާންގެ އައު ރައީސް މަޤާމުގެ ހުވާ ކުރެއްވުމުގެ ރަސްމިއްޔާތަށް އީރާންގެ ވެރިރަށް ތެހެރާނަށް ވަޑައިގެން ހުންނަވަނިކޮށެވެ. ހަނިއްޔާ މިހާތަނަށް ދިރިއުޅުއްވަމުން ގެންދެވީ ޤަޠަރުގައެވެ.

އިސްމާއީލް ހަނިއްޔާއަށް އަމާޒުކޮށް ދިން ބަޑީގެ ހަމަލާތަކުގައި، އޭނާގެ ބޮޑީގާޑުވެސް މަރުވެފައިވާ ކަމުގައި، އީރާނުގެ އަސްކަރިއްޔާއިން ހާމަކޮށްފައި ވެއެވެ. ހަނިއްޔާ އަވަހާރަކޮށްލުމުގައި އިޒްރޭލުން އަދާކުރި ދައުރަކީ ކޮބައިކަމެއް އެޤައުމުން ހާމަކޮށްފައި ނުވި ނަމަވެސް ހަނިއްޔާ އަވަހާރަކޮށްލުމުގެ އުފާ ޔަހޫދީން ދަނީ ފާޅުކުރަމުންނެވެ.

އީރާންގެ ކުރީގެ ރައީސް އިބްރާހީމް ރައީސީ ދަތުރުކުރެއްވި ހެލިކޮޕްޓަރު ވެއްޓި، މި އަހަރުގެ މެއި މަހުގެ 19 ވަނަ ދުވަހު އެމަނިކުފާނާއި، އީރާން ސަރުކާރުގެ ސީނިއަރ އޮފިސަރުންތަކެއް އަވަހާރަވި ހާދިސާގައިވެސް އިޒްރޭލަށް ތުހުމަތުތައް ކުރެވިފައިވެއެވެ.

އިޒްރޭލަކީ، ދުނިޔޭގެ އެހެންޤައުމުތަކުގެ ސިޔާދަތީ ސަރަހައްދުގެ ތެރެއަށްވަދެ ޓެރަރިޒަމްގެ އަމަލުތައް ހިންގުމުގެ ތުހުމަތުތައް އޮތް ޤައުމެކެވެ. މިގޮތުން ލުބުނާނުގެ ކުރީގެ ބޮޑުވަޒީރު ރަފީޤުލްހަރީރީ އާއި، ފަލަސްޠީނުގެ ރައީސް ޔާސިރު އަރަފާތާއި، އެމެރިކާގެ ކުރީގެ ރައީސް ޖޯން އެފް ކެނެޑީ އަވަހާރަކޮށްލީވެސް އިޒްރާއީލުން ކަމުގެ ތުހުމަތުތައް ކުރެވިފައި އޮވެއެވެ.