މަރުކަޒީ ބޭންކް އެމްއެމްއޭގެ ގަވަރުނަރުގެ މަޤާމަށް ކުރީގެ ފިނޭންސް މިނިސްޓަރ އަހުމަދު މުނައްވަރު ޢައްޔަނުކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.

މުނައްވަރު އެމްއެމްއޭގެ ގަވަރުނަރުކަމުގެ މަޤާމަށް ޢައްޔަނުކުރުމަށް ރައީސުލްޖުމްހޫރިއްޔާއަށް ލަފާއެރުއްވުމަށް ފާސްކޮށްފައި ވަނީ ރައްޔިތުންގެ މަޖިލީހުގައި މިއަދު ނެގި ވޯޓުގައި ވޯޓުގައި ބައިވެރިވެވަޑައިގެންނެވި 78 މެމްބަރުންގެ އިއްތިފާޤުންނެވެ.

ރައީސް ޔާމީންގެ ވެރިކަމުގައި ފިނޭންސް މިނިސްޓަރުކަމުގެ މަޤާމުވެސް ފުރުއްވި މުނައްވަރު، މިސަރުކާރުން ވަނީ މިނިސްޓަރެއްގެ ފެންވަރުގައި، ފިނޭންސް މިނިސްޓަރުގެ އެޑްވައިޒަރުންގެ ގޮތުގައި އައްޔަނު ކުރައްވާފައެވެ.

އެންމެ ފަހުން އެމްއެމްއޭގެ ގަވަރުނަރުގެ މަޤާމުގައި ހުންނެވީ، އެމްޑީޕީގެ އެންމެ ފުރަތަމަ ވެރިކަމުގައި ފިނޭންސް މިނިސްޓަރު ކަމުގެ މަޤާމުވެސް ފުރުއްވި ޢަލީ ހާޝިމެވެ. މަޤާމުގެ މަސްއޫލިއްޔަތު އަދާނުކުރެވޭކަމަށް ތުހުމަތުކޮށް އަލީ ހާޝިމް ވަނީ އެމަޤާމުން ވަކިކޮށްފައެވެ.

ސަރުކާރުން އެމްއެމްއޭގެ ގަވަރުނަރުގެ މަޤާމުން ޢަލީ ހާޝިމް ވަކިކޮށް، އެމަޤާމަށް މުނައްވަރު ޢައްޔަނުކުރުމަށް ނިންމާފައި މިވަނީ، ދައުލަތުގެ މާލީ ހާލަތު ވަރަށް ބޮޑަށް ގޯސްވެފައިވާ ދަނޑިވަޅެއްގައެވެ.