ސްރީލަންކާގައި މި މަހުގެ 24 އިން 28 އަށް ކުރިޔަށްދިޔަ އެ ގައުމުގެ ނެޝަނަލް އެންޑް ޖޫނިއާ ނެޝަނަލް ލޯންގް ކޯސް ސްވިމިން ޗެމްޕިއަންޝިޕްސްގައި އުމުރުން 13 އަހަރުގެ އަމްނާ ތަޒްކިޔާ މިރުޞާދު ތިންވަނަ އިންޑިވިޖުއަލް މެޑަލް ހޯދައިފިއެވެ. މިއީ މި މުބާރާތުގައި އޭނާ ހޯދި ފަސްވަނަ  މެޑަލްއެވެ.

މުބާރާތުގެ ފަހު ދުވަހު ޖޫނިއަރ ކެޓަގަރީގެ 200 މީޓަރ އިންޑިވިޖުއަލް މެޑްލޭ އިވެންޓުގައި ވާދަކޮށް، އެންމެ ފަހުން އޭނާ ހޯދީ ސިލްވަރ މެޑަލްއެވެ.

މި މުބާރާތުގައި ތަޒްކިޔާ ފުރަތަމަ ހޯދާފައިވަނީ 100 މީޓަރ ފްރީސްޓައިލް އިވެންޓުން ބްރައުންޒް މެޑަލްއެކެވެ. ދެވަނައަށް ހޯދާފައިވަނީ 50 މީޓަރ ފްރީސްޓައިލް އިވެންޓުން ސިލްވަރ މެޑަލް އެކެވެ. އަދި 4 ގުނަ 100 މީޓަރ މެޑްލޭ ރިލޭ އަދި 4 ގުނަ 50 މީޓަރ ފްރީސްޓައިލް ރިލޭ އިވެންޓުން ލޯމެޑަލް ހޯދި ޓީމުގައިވެސް ތަޒްކިޔާ ހިމެނެއެވެ.

މީގެ އިތުރުން އަންހެނުންގެ ލޯންގކޯސް 100 މީޓަރ ފްރީސްޓައިލް އިވެންޓާއި އަދި އަންހެނުންގެ ލޯންގކޯސް 200 މީޓަރ ބެކްސްޓްރޯކް އިވެންޓުގެ ގައުމީ ރެކޯޑުވެސް އޭނާ ވަނީ އައުކޮށްފައެވެ.