ދެ އޮލިމްޕިކްސްގައި މެޑަލް ހޯދާފައިވާ އިންޑިއާގެ އެއްވަނަ ބެޑްމިންޓަން ކުޅުންތެރިޔާ، ޕީވީ ސިންދޫ އަތުން ރާއްޖޭގެ ނަބާހާ އަބްދުއް ރައްޒާގު ބަލިވެއްޖެއެވެ. ދުނިޔޭގެ 13 ވަނައިގައި ސީޑުކޮށްފައިވާ އަދި ރިއޯ ގޭމްސް 2016 ގައި ރިހި މެޑަލް ހޯދުމަށްފަހު ޓޯކްޔޯ ގޭމްސް 2020 ގައި ބްރޯންޒް މެޑަލް ހޯދާފައިވާ ސިންދޫ މި މެޗު ކާމިޔާބުކޮށްފައިވަނީ 2-0 އިންނެވެ.

ނަބާހާއާ ދެކޮޅަށް ފުރަތަމަ ސެޓު ސިންދޫ ގެންދިޔައީ 21-9 އިންނެވެ. މި ސެޓުގެ ކުރީކޮޅު ނަބާހާ ވަނީ ސިންދޫގެ މައްޗަށް ކުރިހޯދޭތޯ ގިނަ މަސައްކަތްތަކެއް ކޮށްފައެވެ. އެގޮތުން ދެ ފަހަރެއްގެ މަތިން ޕޮއިންޓު ހަމަހަމަ ކުރިތަން ވެސް ފެނިގެން ދިޔައެވެ.

ނަމަވެސް ސިންދޫގެ ތަޖުރިބާއާއެކު، ދެވަނަ ސެޓު އޭނާ ފަސޭހަކޮށް ގެންދިޔައެވެ. ދެވަނަ ސެޓުގެ ނަތީޖާއަކީ 21-6 އެވެ.

ނަބާހާއަށް އަދި ގްރޫޕް ސްޓޭޖުގެ އެއް މެޗު އޮންނާނެއެވެ. އެ މެޗުގައި އޭނާ ބައްދަލު ކުރަންޖެހެނީ އެސްޓޯނިއާގެ ކްރިސްޓިން ކޫބާއާއެވެ. މި މެޗު ކުޅޭނީ ޖުލައި 30 ވަނަ ދުވަހު ރާއްޖެ ގަޑިން މެންދުރު 11:30 ގައެވެ.