ސްރީލަންކާގައި މިހާރު ކުރިއަށްދާ އެ ގައުމުގެ ނެޝަނަލް އެންޑް ޖޫނިއާ ނެޝަނަލް ލޯންގް ކޯސް ސްވިމިން ޗެމްޕިއަންޝިޕްސްގައި ދިވެހި ފެތުންތެރިޔާ، އުމުރުން އެންމެ 13 އަހަރުގެ އަމްނާ ތަޒްކިޔާ މިރުޞާދު، ގައުމީ ދެ ރެކޯޑު އައުކުރުމަށްފަހު، އިންޑިވިޖުއަލް ދެވަނަ މެޑަލް އެއް ވެސް ހޯދައިފިއެވެ.

އޭނާ ފުރަތަމަ މެޑަލް ހޯދީ އަންހެނުންގެ ލޯންގކޯސް 100 މީޓަރ ފްރީސްޓައިލް އިވެންޓުންނެވެ. އެ އިވެންޓު 01:05.53 އިން ނިންމާ ގައުމީ ރެކޯޑު އައުކޮށް، އިވެންޓުގެ ލޯ މެޑަލް ވެސް ހޯދިއެވެ.

އެއަށްފަހު ދެން މެޑަލެއް މި ހޯދީ 50 މީޓަރ ފްރީސްޓައިލް އިވެންޓުންނެވެ. އޭނާ ވަނީ ފައިނަލުގައި 00:29.67 އިން ރޭސް ނިންމާ، އިވެންޓުން ރިހި މެޑަލް ހޯދާފައެވެ.

މީގެ އިތުރުން، ހަމަ މި މުބާރާތުގައި 4 ގުނަ 100 މީޓަރ މެޑްލޭ ރިލޭ އިވެންޓުން ލޯ މެޑަލް ހޯދި ޓީމުގައިވެސް ތަޒްކިޔާ ހިމެނެއެވެ.

މި މުބާރާތުގައި އޭނާ ދެން އައުކޮށްފައިވާ ގައުމީ ރެކޯޑަކީ، އަންހެނުންގެ ލޯންގކޯސް 100 މީޓަރ ފްރީސްޓައިލްއެވެ. އެ އިވެންޓު 01:05.53  އިން ނިންމާ، މީގެ 8 އަހަރު ކުރިން، 2016  ވަނަ އަހަރު ބޭއްވި ރިއޯ 2016 އޮލިމްޕިކް ގޭމްސްގައި ހަދާފައިވާ ރެކޯޑު އޭނާ ވަނީ އައުކޮށްފައެވެ.