ބައިނަލްއަޤުވާމީ ޤާނޫނުތަކާއި ޚިލާފަށް އިޒްރާއީލުން ވެރިވެގަނެގެން އުޅޭ ގޯލާނުގެ އުސްބިންތަކުގައި އާބާދުކޮށްފައިވާ ޔަހޫދީ އާބާދީއެއްގެ ފުޓުބޯޅަދަނޑަކަށް މިސައިލެއް ވެއްޓި، މަދުވެގެން 10 މީހުން މަރުވެ 20 ވުރެ ގިނަ މީހުން ޒަޚަމްވެއްޖެއެވެ.

ބައެއް ރިޕޯޓްތައް ބުނާ ގޮތުގައި މަރުވި މީހުންގެ އަދަދު މިހާރު ވަނީ 15އަށް މަތިވެފައެވެ. މަރުވި މީހުންގެ ތެރޭގައި ހިމެނެނީ، ފުޓުބޯޅަދަނޑުގައި ކުޅެން ތިބި ޔަހޫދީ ކުޑަކުދިންތަކަކާއި އާއްމުންގެ ބައެކެވެ. 

ހަމަލާދިނީ ހިޒްބުﷲއިން ކަމުގައި އިޒްރާއީލުގެ އަސްކަރިއްޔާއިން ބުނެފައި ވާއިރު، އެހަމަލާގެ ޒިންމާ އުފުލުމަށް ހިޒްބުﷲ އިން ވަނީ ދެކޮޅު ހަދާފައެވެ. ބައެއް ރިޕޯޓްތައް ބުނާ ގޮތުގައި، އެހާދިސާ ހިނގީ އިޒްރޭލުން ދިފާއަށް ބޭނުން ކުރާ އަޔަންޑޯމުގައި މައްސަލައެއް ދިމާވެ، ރޮކެޓްތައް އިންސެޕްޓް ކުރުމަށް ބޭނުންކުރާ މިސައިލެއް ފުޓުބޯޅަ ދަނޑަށް ވެއްޓުމުންނެވެ. މިއީ 8 އޮކްޓޫބަރުގައި ޣައްޒާއިން ފަލަސްޠީނުގެ ނަސްލު ނައްތާލުމަށް އިޒްރޭލުން ޤަތުލު އާއްމުތައް ހިންގަންފެށި ފަހުން، އިޒްރޭލުގެ އާއްމުންގެ އެންމެ ގިނަ މީހުން މަރުވި ހާދިސާއެވެ. މިހާދިސާގެ ބަދަލު ހިފާނެ ކަމުގައި އިޒްރާއީލުން ވަނީ ބުނެފައެވެ.