ފްރާންސްގެ ޕެރިހުގައި މިހާރު ކުރިޔަށްދާ ދުނިޔޭގެ އެންމެ ބޮޑު ކުޅިވަރު މުބާރާތުގެ ޕްރިލިމިނަރީ ބުރުން ގައުމީ ޓީޓީ ތަރި، ފާތިމަތު ދީމާ އަލީ ބަލިވެއްޖެއެވެ.

އުމުރުން 16 އަހަރުގެ ދީމާ ކުޅުނު މި މެޗުގައި ބައްދަލުކޮށްފައިވަނީ ޕޮލަންޑުގެ ކަޓާރްޒައިނާ ވޭގަޖަންއާއެވެ. އޭނާއަކީ ދުނިޔޭގެ ޓޭބަލް ޓެނިސް ރޭމްކިންގެ 135 ވަނައިގައި އޮތް ކުޅުންތެރިޔާއެވެ. ގަދަ 64 ކުޅުންތެރިންގެ ބުރުން ޖާގަ ހޯދުމަށް ކުޅުނު މި މެޗު ކަޓާރްޒައިނާ ކާމިޔާބުކުރީ ސީދާ ހަތަރު ސެޓުންނެވެ.

ކަޓާރްޒައިނާ މި މެޗު ކާމިޔާބުކޮށްފައިވަނީ 11-05, 11-05, 11-02 އަދި 11-08 އިންނެވެ.

ޕްރިލިމިނަރީ ބުރުން އޮލިމްޕިކްސް ނިންމާލަން ޖެހުނު ނަމަވެސް، ދީމާ އޮލިމްޕިކްސްއަށް ދިޔައީ ތާރީހީ ކާމިޔާބަކާއެކުއެވެ. ދީމާ އަކީ އޮލިމްޕިކްސް އަށް ކޮލިފައިވެގެން މުބާރާތުގައި ވާދަކުރި ދިވެހި ހަމައެކަނި އެތުލީޓެވެ.

މި ފަހަރުގެ އޮލިމްޕިކްސް އަކީ އެންމެ ގިނަ ކުޅިވަރުގައި ރާއްޖެއިން ވާދަކުރާ ފަހަރެވެ. އެގޮތުން، ޓީޓީގެ އިތުރުން ބެޑްމިންޓަނާއި ސްވިމިން އާއި އެތުލެޓިކްސް ހިމެނޭ ގޮތަށް، ޖުމްލަ ފަސް ދިވެހި އެތުލީޓުން އޮލިމްޕިކްސްގައި ފެންނާނެއެވެ. 

އޮލިމްޕިކްސްގައި މާދަމާ ވެސް ދިވެހި ކުޅުންތެރިއެއް ކުޅޭނެއެވެ. ބެޑްމިންޓަންގައި ރާއްޖެ ތަމްސީލު ކުރާ ނަބާހާ މާދަމާ ނިކުންނާނީ އިންޑިއާގެ ޕީވީ ސިންދޫއާ ދެކޮޅަށެވެ.