މިދިޔަ ބުދަ ދުވަހު، ނޭޕާލުގެ ސައުރަޔާ އެއާލައިންގެ މަތިންދާ ބޯޓު ވެއްޓުނު ހާދިސާގައި ފުރާނަ ސަލާމަތްވި ހަމައެކަނި މީހަކި އެބޯޓުގެ ޕައިލެޓް ކަމުގައި ނޭޕާލުގެ މީޑިއާތަކުން ބުނެފިއެވެ.

ނޭޕާލުގެ މީޑިއާތަކުން ޚަބަރު ފަތުރާފައިވާ ގޮތުގައި، އެބޯޓުގެ ޕައިލެޓް، މަނިޝް ޝަކްޔާއަށް ކަތުމަންޑޫގެ ކޭއެމްސީ ހޮސްޕިޓަލުގައި ދަނީ ފަރުވާދެމުންނެވެ.

ސައުރަޔާ އެއާލައިންގެ  9N-AME މަތިންދާ ބޯޓު ވެއްޓުނީ، ނޭޕާލްގެ ޕޮކްރާއަށް ދިޔުމަށްޓަކައި، ތްރިބުވަން އެއާޕޯޓުން ފުރިތަނާއެވެ. އެ ބޯޓުން ދަތުރުކުރި މީހުންގެ ތެރޭގައި ހިމެނެނީ އެ އެއާލައިންގެ 19 މުވައްޒަފުންނެވެ. އެމީހުންގެ ތެރެއިން ޕައިލެޓް ފިޔަވާ އެހެން އެންމެން ފްލައިޓް ވެއްޓުނު އެހާދިސާގައި ވަނީ މަރުވެފައެވެ.

ވެއްޓުނު އެ މަތިންދާ ބޯޓަކީ، 2003 ވަނަ އަހަރު ކެނެޑާގައި އުފައްދާފައިވާ، ބޮމްބާޑިއާ  CRJ 200 މަރުކާގެ މަތިންދާ ބޯޓެކެވެ.  އެމެރިކާ އާއި އެފްރިކާގެ އެއާލައިންތަކުން ބޭނުންކޮށްފައިވާ އެ މަތިންދާ ބޯޓު، ސައުރަޔާ އެއާލައިނުން ގަތީ، 14 މާރިޗު 2017 ގައެވެ.

ނޭޕާލަކީ، ދުނިޔޭގައިވެސް ވައިގެ ދަތުރުފަތުރުގެ ސަލާމަތާއި ރައްކާތެރިކަމުގެ ހާލަތު އެންމެ ގޯސް ޤައުމުގެ ގޮތުގައި ފާހަގަކޮށްފައިވާ ޤައުމެވެ. ނޭޕާލުގައި ހިނގާ މަތިންދާ ބޯއްޓު ވެއްޓުމުގެ ހާދިސާތައް ވަރަށް ގިނައެވެ. އެހެންވެ، ދުނިޔޭގެ ބޮޑެތި އެއާލައިންތަކުން ނޭޕާލަށް ދަތުރެއް ނުކުރެއެވެ.

ނޭޕާލުގެ ވައިގެ ދަތުރުފަތުރުގެ ތާރީޚުގައި ހިނގި އެންމެ ގިނަ މީހުން މަރުވި ހާދިސާ އަކީ، 1992 ވަނަ އަހަރު ޕާކިސްތާން އިންޓަރނޭޝަނަލް އެއާލައިންގެ މަތިންދާ ބޯޓެއް ވެއްޓުނު ހާދިސާއެވެ. އެހާދިސާގައި 167 މީހުން މަރުވިއެވެ.