އިޒްރާއީލުން ޣައްޒާގައި ހިންގަމުންދާ ޤަޠުލުއާއްމު ތަކުގެ ސަބަބުން، ޣައްޒާގެ އާބާދީގެ ކޮންމެ 10 މީހަކުން 9 މީހަކީ މިހާރު ގެދޮރުގެއްލިފައިވާ މީހެއް ކަމުގައި، ޔުނެއިޓެޑްނޭޝަންސް ރިލީފް އެންޑް ވޯކްސް އޭޖެންސީ ހާމަކޮށްފިއެވެ.

އޮކްޓޫބަރު މަހުގެ 8 ވަނަ ދުވަހުން ފެށިގެން ހައްދުފަހަނަ އެޅި އިޒްރާއީލުގެ ސިފައިން ޣައްޒާގައި ހިންގަމުންދާ އުދުވާންތަކުގައި މިހާތަނަށް، 40000 ވުރެ ގިނަ ފަލަސްޠީނުގެ ރައްޔިތުން ޝަހީދުކޮށްފައި ވާއިރު، ބޮންއަަޅައި މުޅި ޣައްޒާ ވަނީ ފުނޑުފުނޑުކޮށްފައެވެ.  

އިޒްރޭލުން ޣައްޒާގެ ރައްޔިތުންނާއި ދެކޮޅަށް ހިންގަމުންދާ ނަސްލު ނައްތާލުމުގެ ޢުދުވާނު ހުއްޓުވުމުގެ ބަދަލުގައި، އެމެރިކާ އާއި އިނގިރޭސިވިލާތާއި އިންޑިއާއިން އަންނަނީ، އިޒްރޭލަށް ހަތިޔާރާއި އެނޫންވެސް ގޮތް ގޮތުން މަދަދު ދީ އެހީތެރިވަމުންނެވެ.

ޔޫރަޕުން ފަލަސްޠީނުގެ ބިމަށް ހިޖުރަކުރި، ޞަހްޔޫނީންގެ ޓެރަރިސްޓް ގުރޫޕްތަކަށް، އިނގިރޭސީންނާއި އެމެރިކާއިން އިސްވެ އޮވެ، އިޒްރޭލުގެ ނަމުގައި ޔަހޫދީ ދައުލަތެއް އުފައްދައިދިނުމުގެ ފަހުން، އިޒްރޭލުން އަންނަނީ، ފަލަސްޠީނުގެ ރައްޔިތުންނާއި ދެކޮޅަށް ޤަޠުލު އާއްމުތައް ހިންގައި ބިންތައް ފޭރި، އަދި ފަލަސްޠީނުގެ ރައްޔިތުން އެމީހުންގެ ގެދޮރުން ނެރެ ރެފިއުޖީންގެ ގޮތުގައި ފަލަސްޠީނުން ބޭރުވުމަށް މަޖުބޫރު ކުރުވަމުންނެވެ.