އިނގިރޭސި ވިލާތުގެ މެންޗެސްޓަރ އެއާޕޯޓުގައި އުމުރުން 19 އަހަރުގެ މުސްލިމް ޒުވާން ފިރިހެނަކު ހައްޔަރު ކުރުމުގެ ތެރޭގައި، ގަސްދުގައި ބޮޑެތި އަނިޔާތަކެއްދިން އިނގިރޭސި ފުލުހެއްގެ މައްސަލަ ބަލަން ފަށާފައިވާ ކަމުގައި އިނގިރޭސި ވިލާތުގެ މީޑިއާތަކުން ހާމަކޮށްފިއެވެ.

މިހާދިސާ ހިނގީ މިޖުލައި މަހުގެ 23 ވަނަ ދުވަހުގައެވެ. އެހާދިސާގެ ވީޑިއޯ ސޯޝަލް މީޑިއާގައި ދައުރުވެ މެންޗެސްޓަރގައި ފުލުހުންނާއި ދެކޮޅަށް އާއްމުން ވަނީ މުޒާހަރާވެސް ކޮށްފައެވެ.

ދައުރުވަމުން އަންނަ ވީޑިއޯއިން ފެންނަގޮތުގައި، އެ ޒުވާނާ ބިންމައްޗަށް ވައްޓާލައި ބިޑިއަޅުވަން އުޅުނު އިރު އިނގިރޭސި ފުލުސް މީހާވަނީ، އޭނާގެ އެންކަލް ބޫޓުން ކޮޅުފައި ޒުވާނާގެ ބޮލުގައި ވަރަށް ބާރަށް ދެތިން ފަހަރަސް ކޮޅުފައިން ޖަހައި، އަދި އޭނާގެ ބޮލަށް ފައިން އަރާފައެވެ. އެ ކަމުގެ ސަބަބުން އެޒުވާނާގެ ސިކުނޑިއަށް ގެއްލުން ލިބި ފުރާނައަށް ނުރައްކާވެ، ހޮސްޕިޓަލުގައި އަންނަނީ ފަރުވާދެމުންނެވެ.

މެންޗެސްޓަރގެ ފުލުހުން ވަނީ، އެ އޮފިސަރު ވަޒީފާއިން ސަސްޕެންޑްކޮށް އޭނާގެ މައްސަލަ ބަލަމުންދާކަމުގައި ހާމަކޮށްފައެވެ، މިމައްސަލަ އާއި ގުޅިގެން އެ އޮފިސަރުގެ މައްޗަށް ޖިނާޢީ ދައުވާ އުފުލާނޭ ކަމުގައި މީޑިއާތަކުން ބުނެފައިވެއެވެ.