މިނިވަންދުވަހުގެ މުނާސަބަތުގައި ބާއްވަމުން އަންނަ ރަސްމީ ޕެރޭޑު ވިއްސާރަވުމާ ގުޅިގެން ކެންސަލް ކުރުމަށްފަހު، އެ ޕެރޭޑު އޯގަސްޓް 2 ވާ ހުކުރު ދުވަހު ބާއްވަން ނިންމާފައިވާކަމަށް، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހާމަކޮށްފިއެވެ.

އެމްއެންޑީއެފްއިން އެކްސްގައި ކޮށްފައިވާ ޕޯސްޓެއްގައި ބުނެފައިވަނީ، މިނިވަންދުވަހުގެ މުނާސަބަތުގައި މާލޭގައި ބޭއްވުމަށް ތާވަލްކުރެވުނު ސިފައިންގެ މަގުމަތީ ހިނގާލުން، މޫސުން ތަންނުދިނުމުގެ ސަބަބުން ކުރިޔަށް ނުގެންދެވުމާ ގުޅިގެން، އެ ހިނގާލުން 2 އޮގަސްޓް ވާ ހުކުރުދުވަހު ހަވީރު ބާއްވާގޮތަށް ހަމަޖެހިފައިވާކަމުގައެވެ.

މިނިވަންދުވަހު ބާއްވަން ރާވާފައިއޮތް މި ހަރަކާތާ ގުޅިގެން، މާލޭގެ މަގުތަކުގައި ހަވީރު 4-6 އަށް އެއްގަމު އުޅަނދު ދުއްވުން ވެސް މަނާކުރިއެވެ. ނަމަވެސް މި ހަރަކާތް ކެންސަލްވުމާ ގުޅިގެން، އެ އެންގުން ވަނީ އުވާލާފައެވެ.

މި ހިނގާލުމުގައި ސިފައިންގެ އިތުރުން، ގައުމީ ކެޑޭޓް ކޯ ވެސް ބައިވެރިވާނެއެވެ.