އިންޑިއާ ސަރުކާރުން ރާއްޖެއަށް ހަދިޔާކޮށްފައި އޮތް ޑޯނިއާ މަތިންދާ ބޯޓުގައި އަލުން ބަލިމީހުން އުފުލަން ފަށައިފިއެވެ.

މިކަން ހާމަކުރެއްވީ، މިނިވަން ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒުއެވެ. ރައީސް ވިދާޅުވީ، އިންޑިއާއިން ދިވެހިރާއްޖެއަށް ހަދިޔާކޮށްފައި އޮތް ޑޯނިއާ ފްލައިޓްގައި މިރޭ ބަލި މީހަކު ހަނިމާދޫން މާލެ ގެނެސްފައިވާ ކަމަށެވެ. މިއީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވެރިކަމުގެ މި 8 މަސްދުވަހުގެ ތެރޭގައި ބަލި މީހުން އުފުލުމަށް އިންޑިއާގެ ޑޯނިއާ މަތިންދާ ބޯޓު ބޭނުން ކުރި ފުރަތަމަ ފަހަރެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމާއި ހަވާލުވުމަށްފަހުގައި މިހާތަނަށް އިންޑިއާއިން ހަދިޔާކޮށްފައިވާ ދެ ހެލިކޮޕްޓަރާއި ޑޯނިއާ ފްލައިޓް ބޭނުން ކުރުން އޮތީ ހުއްޓާލާފައެވެ. އަދި ރާއްޖޭގެ ހަތަރު ސަރަހައްދެއްގައި ތިބި އިންޑިއާގެ އަސްކަރިއްޔާއަށް ނިސްބަތްވާ މީހުން ފޮނުވާލުމަށްފަހު، އިންޑިއާގެ މަދަނީ މީހުން ފޮނުވުމަށް އިންޑިއާ އަސްކަރިއްޔާއަށް ސަރުކާރުން ވަނީ ފުރުޞަތު ދީފައެވެ.

އިންޑިއާގެ ޑޯނިއާ މަތިންދާ ބޯޓު ބަލި މީހުން އުފުލުމަށް އަލުން ބޭނުން ކުރަންފެށިކަން ރައީސުލްޖުމްހޫރިއްޔާ އިޢުލާނު ކުރެއްވި އިރު، މިއަހަރުގެ މާރިޗު މަހުގައި ވަނީ، މޯލްޑިވިއަންގެ ޑޭޝް-8 ގެ މަތިންދާ ބޯޓަކާއި މޯލްޑިވިއަންގެ ސީޕްލޭނެއް އެއާ އެންބިއުލާންސްތަކުގެ ގޮތުގައި ބޭނުންކުރަން ފަށާފައެވެ.