ހުޅުމާލޭގެ އެކި ސަރަހައްދުތަކުގެ ދުވާރު މަތީގައި އަދި ހެޖު ތެރޭގައި ކެފޭ، ރެސްޓޯރެންޓް އަދި ޓޭކް-އަވޭ ޕޮއިންޓުތަކުން ގޮނޑި މޭޒު ބަހައްޓައިގެން ޚިދުމަތްދެމުންގެންދާތީ އެކަން ހުއްޓާލުމަށް ހުޅުމާލެ ޑިވެލޮޕްމެންޓް ކޯޕަރޭޝަން (އެޗްޑީސީ) އިން އަނގައިފިއެވެ.

އެޗްޑީސީއިން އަންގާރަ ދުވަހު ކުރި އިއުލާނެއްގައި ބުނެފައިވާ ގޮތުން، ދުވާރު މަތީގައި އަދި ހެޖު ތެރޭގައި ކެފޭ، ރެސްޓޯރެންޓް އަދި ޓޭކް-އަވޭ ޕޮއިންޓުތަކުން ގޮނޑި މޭޒު ބަހައްޓައިގެން ޚިދުމަތްދެމުންގެންދާތީ އެކަމުގެ ސަބަބުން އާންމުން ހިނގާބިނގާވެ އުޅުމަށް އުދަގޫވާ ކަމަށާއި، އެކަމުގެ ޝަކުވާ އެ ކޯޕަރޭޝަނަށް ލިބެމުން އަންނަ ކަމަށެވެ.

މީގެ އިތުރުން ސްކޫލު ހިމެނޭ ސަރަހައްދުތަކުގައި މިގޮތަށް ބަހައްޓާފައިވާ މޭޒުތަކުގެ ކައިރީގައި ތިބެ ދުންފަތުގެ އިސްތިއުމާލު ކުރުމުގެ ސަބަބުން އާންމުންނާއި ކުޑަކުދިންނަށް ދުންފަތުގެ ނޭދެވޭ އަސަރު ކުރުމާއި، އަދަބާ ހިލާފު އިބާރާތްތަކުން މުއާމަލާތްކުރާކަމުގެ ޝަކުވާ، ބެލެނިވެރިންގެ އިތުރުން ސްކޫލުތަކުން ވެސް ހުށަހަޅާފައިވާކަމަށް އެ އިއުލާނުގައި ބުނެފައިވެއެވެ.

އެހެންކަމުން، ވިޔަފާރިތަކުން މިކަން ހުއްޓައި، ވިޔަފާރި ކުރުމުގެ އުސޫލާ އެއްގޮތަށް މަސައްކަތް ކުރުމަށް އަންގާފައިވެއެވެ. އަދި އުސޫލުތަކަށް ބޯނުލަނބާނަމަ، ކަމާ ގުޅުންހުރި އިދާރާތަކާ ގުޅިގެން ފިޔަވަޅު އަޅާނެކަމަށް ބުނެފައިވެއެވެ.