އިންޓަނެޓަށް ބުރޫއަރައި ދުނިޔޭގެ އެތައް ގައުމެއްގެ ވިޔަފާރިތަކާއި މުއައްސަސާތަކަށް ބުރޫ އަރައި، އެއާރލައިންތަކާއި ސަރުކާރުގެ ހިދުމަތްތަކާއި ބޭންކުތަކާއި ސުޕަމާކެޓްތަކާއި ޓެލެކޮމް އަދި މީޑިއާތައް ހަލަބޮލިކަމުގެ ތެރެއަށް ވައްޓާލައިފިއެވެ.

އިންޓަނެޓު މެދުކެނޑުނު ސަބަބު އަދި ސާފުވެފައި ނުވިނަމަވަސް، ހިދުމަތް މެދުކެނޑުނުތާ ގަޑިއިރުތަކެއް ފަހުން މައިކްރޯސޮފްޓުން ބުނެފައިވަނީ އިންޓަނެޓަށް ދިމާވި މައްސަލައަކާ ގުޅިގެން މައިކްރޯސޮފްޓް 365 އެޕްލިކޭޝަންތަކާއި ހިދުމަތްތަކަށް ބުރޫ އަރާފައިވާކަމަށެވެ.

ހަބަރުތައް ބުނާ ގޮތުން، ދުނިޔެއަށް މި ދިމާވި ސައިބާރ ހަމަލާ ޓާގެޓް ކޮށްފައިވަނީ ކްރައުޑްސްޓްރައިކް ކިޔާ ސައިބާރސެކިއުރިޓީ ފާމް އަކަށެވެ.

މި މައްސަލައާ ގުޅިގެން މައިކްރޯސޮފްޓް ވިންޑޯޒް އޮޕަރޭޓިން ސިސްޓަމް ބޭނުންކުރާ މެޝިންތަކުގެ މަސައްކަތަށް ވަނީ ހުއްޓުން އަރައިފައެވެ. މިކަމާ ގުޅިގެން ކްރައުޑްސްޓްރައިކް އިން ބުނެފައިވަނީ، މައިކްރޯސޮފްޓްގެ ވިންޑޯޒް އޮޕަރޭޓިން ސިސްޓަމް ކްރޭޝް ވެފައިވާކަން އެނގިފައިވާކަމަށެވެ.

މި މައްސަލައާ ގުޅިގެން އެމެރިކާގެ ބޮޑެތި އެއާލައިންސްތައް ކަމުގައިވާ ޑެލްޓާ، ޔުނައިޓެޑް އަދި އެމެރިކަން އެއާލައިންސް ވަނީ ހުކުރު ދުވަހުގެ ހެނދުނު ގްރައުންޑް ކޮށްފައެވެ. މިކަމުގެ ސަބަބެއް ކަމުގައި ބުނެފައިވަނީ، މުވާސަލާތީ މައްސަލައެއް ކުރިމަތިވުން ކަމަށް ފެޑެރަލް އޭވިއޭޝަން އެޑްމިނިސްޓްރޭޝަނުން ނެރުނު އަޕްޑޭޓެއްގައި ބުނެފައިވެއެވެ.

އިނގިރޭސިވިލާތާއި ޖަރުމަނާއި މެލޭޝިއާ އަދި ފިލިޕީންސްގެ އެއާޕޯޓްތަކުން ވެސް ހިދުމަތްތަކަށް ބުރޫއަރާފައިވާ ކަމަށް ރިޕޯޓްކޮށްފައިވެއެވެ.