2024 ޖުލައި 15 ވަނަ ދުވަހުން ފެށިގެން, ތައިލެންޑަށް ދަތުރުކުރާ ދިވެހީންނަށް "އޮން އެރައިވަލް" 60 ދުވަހުގެ ވިސާ ދޭން ނިންމާފައިވާކަމަށް، ދިވެހި ރާއްޖޭގެ ހާރިޖީ ވުޒާރާއިން ހާމަކޮށްފިއެވެ.

އެ މިނިސްޓްރީ އިން ނެރުނު ބަޔާނުގައި ބުނީ، ޗުއްޓީ ހޭދަކުރުމަށް ދާ ދިވެހީންނަށާއި ވިޔަފާރީގެ ބޭނުންތަކަށް ނުވަތަ މަސައްކަތާ ގުޅުންހުރި އެކި ބޭނުންތަކަށް ތައިލެންޑަށް ދަތުރުކުރާ ދިވެހީންނަށް މި އިންތިޒާމު ހަމަޖެހޭނެ ކަމަށެވެ.

އަދި މިމުއްދަތުގެ އިތުރަށް މަޑު ކުރަން ބޭނުންވެއްޖެނަމަ، އިތުރު 30 ދުވަހުގެ މުއްދަތެއް ލިބުމުގެ ފުރުސަތު އޮންނާނެކަމަށް ވެސް މިނިސްޓްރީއިން ހާމަކުރެއެވެ. ނަމަވެސް ވިސާ އިތުރުކުރުމަށް، ތައިލެންޑަށް ދިއުމަށްފަހު ރޯޔަލް ތައި އިމިގްރޭޝަންގައި އެދެންޖެހޭނެ ކަމަށާއި، ވިޒާ އިތުރުކޮށްދިނުމާ ގުޅޭ ގޮތުން ގޮތެއް ނިންމާނީ އެ އިދާރާއިންކަމަށް ވެސް ހާމަކޮށްފައިވެއެވެ.

މި ނޫން ބޭނުންތަކަށް ތައިލެންޑަށް ދަތުރުކުރާ ފަރާތްތަކުން ދެން ވިސާ ނަގަން ޖެހޭނީ ކޮލަމްބޯގައި ހުންނަ ތައިލެންޑުގެ އެމްބަސީއިންނެވެ.

މި މަހުގެ 15 ވަނަ ދުވަހުން ފެށިގެން ދިވެހިރާއްޖެ ހިމެނޭހެން އިތުރު 92 ގައުމަކަށް 60 ދުވަހުގެ "އޮން އެރައިވަލް" ވިސާ ދިނުމަށް ތައިލެންޑުން ވަނީ ނިންމާފައެވެ.

ދަތުރު ކުރުމުގެ ކުރިން ވިސާ ނެގުމަކާ ނުލައި ދިވެހިންނަށް ތައިލެންޑަށް ދަތުރު ކުރެވެން ފެށީ 2019 މާޗް 23 ވަނަ ދުވަހުން ފެށިގެންނެވެ. ނަމަވެސް އޭރު "އޮން އެރައިވަލް" ވިސާގެ ގޮތުގައި ލިބެނީ 30 ދުވަހުގެ ވިސާ އެކެވެ.