ބެޑްމިންޓަން އެސޯސިއޭޝަން އޮފް މޯލްޑިވްސްގެ ރައީސް މޫސާ ނާޝިދު، އޭނާ ހުރި މަގާމުން އިސްތިއުފާދީފިއެވެ. އޭނާ އިސްތިއުފާ ދީފައި މިވަނީ، އޭނާއާ ގުޅޭ ކޮރަޕްޝަންގެ ބޮޑެތި މައްސަލަތަކެއް ފެންމަތިވެފައި ވަނިކޮށެވެ.

ދުނިޔޭގެ ބެޑްމިންޓަންގެ މައި އިދާރާ، ބީޑަބްލިއުއެފްގެ ކައުންސިލް މެމްބަރުކަމުގެ މަގާމާއި، ބެޑްމިންޓަން އޭޝިއާ ޖެނެރަލް ސެކްރެޓަރީ ކަމުގެ މަގާމާއި، ސައުތު އޭޝިއާގެ ބެޑްމިންޓަން ފެޑެރޭޝަންގެ ސެކްރެޓަރީ ޖެނެރަލްގެ މަގާމު ވެސް އަދާކުރެއްވި މޫސަގެ މައްޗަށް ކުރެވުނު ކޮރަޕްޝަންގެ ތުހުމަތަކީ، އޭނާގެ ހިއްސާ އޮންނަ ކުޅިވަރު ސާމާނު ވިއްކާ ފިހާރައަކުން އެސޯސިއޭޝަނަށް ތަކެތި ގަންނަ މައްސަލައެވެ.

ނަމަވެސް މޫސަގެ މައްޗަށް ކުރެވޭ ކޮރަޕްޝަންގެ މި ތުހުމަތު އޭނާ ވަނީ ދޮގުކޮށްފައެވެ. އަދި އެސޯސިއޭޝަނުން މި މައްސަލާގައި ކުރިން ބުނެފައިވަނީ، މޫސައާ ގުޅުން އޮންނަ ފިހާރައިން ތަކެތި ގަންނަންޖެހެނީ އެތަކެތި ލިބޭ ހަމައެކަނި ތަނަކީ އެއީ ކަމަށްވެފައި, ބެޑްމިންޓަން އެސޯސިއޭޝަނުގެ އެކްސްކޯއިން އެކަމަށް ހުއްދަދީފައިވާތީ ކަމަށެވެ.

މޫސަ ވަނީ ބެޑްމިންޓަން އެސޯސިއޭޝަންގެ މަގާމުގައި ތިން ދައުރު ފުރިހަމަކޮށްފައެވެ. އެންމެ ފަހުން އޭނާ ފުރި ހަތަރު އަހަރުގެ ދައުރު ހަމަވީ މި އަހަރުގެ ތެރޭގައެވެ. އެއަށްފަހު އިންތިހާބެއް ނުބާއްވައި، މޫސަ އިސްވެ ހުންނަވައިގެން ބެޑްމިންޓަން އެސޯސިއޭޝަން ހިންގާ މައްސަލަ ވަނީ ވަރަށް ބޮޑަށް ގޯސްވެފައެވެ.

އޭގެ ފަހުން ބެޑްމިންޓަން އެސޯސިއޭޝަނުން ބާއްވަން އުޅުނު އިންތިހާބުގައި އޭނާ ވަނީ ނައިބް ރައީސްކަމަށް ކުރިމަތިލާފައެވެ. ނަމަވެސް، ކޮމިޝަނަރ އޮފް ސްޕޯޓްސް ވަނީ އެ އިންތިހާބު ހުއްޓުވާފައެވެ.

އަދި ރާއްޖޭގެ ކަމިޝަނަރ އޮފް ސްޕޯޓްސްއިން ވަނީ މި މައްސަލަ އިންޓަނޭޝަނަލް ބެޑްމިންޓަން ފެޑަރޭޝަނާ ވެސް ހިއްސާކޮށްފައެވެ.

މޫސަ އިސްތިއުފާ ދިނީ އިންޓަނޭޝަނަލް ބެޑްމިންޓަން ފެޑަރޭޝަނުން އޭނާ އަށް އެކަން އެންގުމުންނެވެ.