މާޅޮސްމަޑުލު އުތުރުބުރީ އިނގުރައިދޫ ކައުންސިލުން އަންގާފައިވާ ގޮތާ ޚިލާފަށް، ބައެއް ބޭފުޅުން އެރަށުން މިދިލި އޮށް ހޮވާތީ އެ ކައުންސިލުން އެކަމާ ކަންބޮޑުވުން ފާޅުކޮށްފިއެވެ.

އެ ކައުންސިލުން 2024 ޖުލައި 14 ގައި ކޮށްފައިވާ އިއުލާނެއްގައި ވާގޮތުން، ކޮންމެ މަހަކު އެއް ދުވަހު މިދިލި އޮށް ހޮވާގޮތަށް ހަމަޖައްސާފައި އޮންނަނީ، މި ފުރުސަތު ހުރިހާ ރައްޔިތުންނަށް ހަމަހަމައަށް ފޯރުކޮށްދިނުމަށެވެ. ނަމަވެސް އެ އިދާރާގެ ނިންމުމާ ހިލާފައް، ބައެއް ފަރާތްތަކުން އިތުރު ދުވަސްދުވަހު މި ކަން ކުރަމުން އަންނަ ކަމަށް ފާހަގަ ކުރެވިފައިވާކަމަށް ހާމަކޮށްފައި ވެއެވެ.

"މިރަށުގެ ގިނަ ރައްޔިތުންނަށް ހަމަހަމަގޮތެއްގައި މިދިލިއޮށް ހޮވުމުގެ ފުރުޞަތު ފަހިކޮށް ދިނުމުގެ ގޮތުން ކޮންމެ މަހެއްގެވެސް އެއްދުވަހު އޮށް ހޮވުމަށް ވަނީ ކަނޑައެޅިފައެވެ. ނަމަވެސް އިތުރު ދުވަސް ތަކުގައި ބައެއް ބޭފުޅުން އޮށް ހޮވަމުން ދާކަން މި ކޮމެޓީ އަށް ފާހަގަކުރެވިފައިވާކަން ހިތާމަޔާއެކު ދަންނަވަމެވެ."

އިނގުރައިދޫ ކައުންސިލުން ނެރެފައިވާ އިއުލާނުގައި ބުނެފައި ވެއެވެ.

އިނގުރައިދޫ ކައުންސިލުން ބުނެފައިވަނީ، އެންގުމާ ހިލާފަށް މިދިލި އޮށް ހޮވާނަމަ ފިޔަވަޅު އަޅާނެކަމަށެވެ. އަދި މިފަދަ ފަރާތްތަކުގެ މައުލޫމާތު ރިޕޯޓުކޮށްދިނުމަށް ވެސް ކައުންސިލުން އެދިފައި ވެއެވެ.