ކޮންމެބޯލް ކޮޕާ އެމެރިކާ 2024 ގެ ތައްޓާއެކު ޖެހިޖެހިގެން ބައިނަލްއަގްވާމީ 3 ތަށި ކާމިޔާބުކޮށް، މާޒީގެ ހިތި ހަނދާންތައް އާޖެންޓީނާއިން މުޅިން ފޮހެލައިފިއެވެ. 

މީގެ 10 އަހަރު ކުރިޔަށްޖެހިލާއިރު، 2014 ވަނަ އަހަރުގެ ވޯލްޑް ކަޕް ފައިނަލުގައި ޖަރުމަނުވިލާތުން އިތުރު ވަގުތުގައި ޖެހި ގޯލަކުން އާޖެންޓީނާ ބަލިވި ފަހުން، އެ ޓީމު ޖެހިޖެހިގެން ދެން ކުޅުނު ދެ ފައިނަލުން ވެސް ވަނީ ބަލިވެފައެވެ. އެއީ 2015 ވަނަ އަހަރާއި 2016 ވަނަ އަހަރުގެ ކޮޕާ އެމެރިކާ ފައިނަލުގައި ޗިލީއާ ބައްދަލުކޮށްގެންނެވެ. މި ދެ ފަހަރު ވެސް އާޖެންޓީނާ ބަލިވީ ޕެނަލްޓީ ޖަހައިގެންނެވެ.

ޖެހިޖެހިގެން 3 ފައިނަލުން ބަލިވުމާ ގުޅިގެން މެސީ އޭރު ގައުމީ ޓީމަށް ކުޅެން ހުއްޓާލަން ވެސް ނިންމިއެވެ. ނަމަވެސް ނިންމުން ބަދަލުކޮށް އަލުން އަނބުރާ އައިސް، ހާލަތު މިހާރު މިއޮތީ ބަދަލުކޮށްފައެވެ.

2016 ވަނަ އަހަރުގެ ފައިނަލުން ބަލިވުމަށްފަހު، އޭގެ 5 އަހަރު ފަހުން 2021 ގައި އާޖެންޓީނާ ފުރަތަމަ ކާމިޔާބުކުރީ ކޮޕާ އެމެރިކާއެވެ. އެއަށްފަހު 2022 ގައި ގަތަރުގައި އޮތް ވޯލްޑް ކަޕަށް ފަހު، އެންމެ ފަހުން އެމެރިކާގައި މިއަދު ނިމުނު ކޮޕާ އެމެރިކާ 2024 އެވެ.

ކޮޕާ އެމެރިކާ 2024 ގެ ފައިނަލުގައި އާޖެންޓީނާ ބައްދަލުކުރީ، މުޅި މުބާރާތުގައި މޮޅު ކުޅުމެއް ދައްކާ ގިނަ ގޯލުތަކެއް ޖަހަމުން އައި ކޮލަމްބިއާއާއެވެ. މި މެޗުގެ ފުރިހަމަ ވަގުތު ހަމަވިއިރު ދެ ޓީމު އޮތީ 0-0 އިން އެއްވަރުވެފައެވެ. އާޖެންޓީނާ އިން މުބާރާތް ކާމިޔާބުކުރީ، އިތުރު މިނެޓުގެ ދެ ހާފުގެ ކުޅުމުގެ ތެރެއިން ލެއުޓާރޯ މާޓިނޭޒް ކާމިޔާބުކުރި ގޯލަކުންނެވެ. މިއީ އޭނާ މި މުބާރާތުގައި ކާމިޔާބުކުރި 5 ވަނަ ގޯލެވެ.

މި މެޗުގައި މެސީއަށް ލިބުނު އަނިޔާއަކާ ގުޅިގެން ދެވަނަ ހާފުގައި އޭނާ ވަނީ ބަދަލުކޮށްފައެވެ.

އާޖެންޓީނާގެ މި ތައްޓާއެކު، އެމީހުންނަކީ މިހާރު ކޮޕާ އެމެރިކާ އެންމެ ގިނަ ފަހަރަށް ކާމިޔާބުކުރި ޓީމެވެ. އެގޮތުން އެ ޓީމުން 16 ފަހަރަށް މުބާރާތް ކާމިޔާބުކޮށްފައިވާއިރު، ދެވަނައަށް އެންމެ ގިނަ ފަހަރަށް މުބާރާތް ކާމިޔާބުކުރި އުރުގުއޭ ވަނީ 15 ފަހަރަށް މުބާރާތް ކާމިޔާބު ކޮށްފައެވެ.