ޓިކެޓު ނެތް މީހުން ދަނޑަށް ވަންނަން މަސައްކަތް ކުރުމުގެ ސަބަބުން ހަމަނުޖެހުން އުފެދި، ކޮލަމްބިއާ އާއި އާޖެންޓީނާ ބައްދަލުކުރާ ކޮޕާ އެމެރިކާ ފައިނަލް މެޗު ފެށުން ލަސްވެއްޖެއެވެ. 

ސަޕޯޓަރުން ހަމަނުޖެހުން ހިންގާފައިވަނީ މެޗު ފެށެން ގާތްގަނޑަކަށް ދެ ގަޑިއިރަށް ވެފައި ވަނިކޮށެވެ. އަދި ސްޓޭޑިއަމް ބަންދުކޮށް، މެޗު ފެށުން ލަސްކުރަން ޖެހުނީ، ޓިކެޓު ގަނެފައި ތިބި މީހުނަށް ދަނޑަށް ވަނުމަށް އުނދަގޫވުމުންނެވެ. 

ފައިނަލް މެޗު ކުޅުމަށް ހަމަޖެހިފައިވަނީ ފްލޮރިޑާގެ މިއާމީގައި ހުންނަ ހާޑް ރޮކް ސްޑޭޑިއަމްގައެވެ. މި ސްޓޭޑިއަމްގައި 75،000 ކުޅިބެލުންތެރިންނަށް ތިބެވެއެވެ. 

ދަނޑަށް ވަންނަން އުޅުމުގެ ތެރޭގައި ކޮލަމްބިއާގެ ޑާވިން މުނޯޒްގެ މަންމަ އާއި މާމައަށް ކޮންމެވެސް ވަރެއްގެ އަނިޔާތަކެއްވެފައިވާކަމަށް ހަބަރުތައް ބުނެއެވެ. ނަމަވެސް ސިއްހީ ފަރުވާ ހޯދަން ޖެހޭ ވަރުގެ އަނިޔާއެއް ވެފައެއް ނުވެއެވެ.

ހަމަނުޖެހުންތަކާ ގުޅިގެން ސްޓޭޑިއަމްގެ ގޭޓު ބަންދުކޮށްފައި ބެހެއްޓުމަށްފަހު މެޗު ފެށެން ދޮޅު ގަޑިއިރަށް ވީތަނާ، ޓިކެޓު ނަގާފައިވާ މީހުން ދަނޑަށް ވައްދަން ވަނީ ފަށާފައެވެ. ނަމަވެސް މި މަސައްކަތް ކުރިޔަށް ގެންދެވުނީ ވަރަށް ލަސްލަހުންނެވެ.

މި ހާދިސާތަކާ ގުޅިގެން މެޗު ފެށުން ވަނީ 1 ގަޑިއިރާ 15 މިނެޓަށް ފަސް ވެގެން ގޮސްފައެވެ.

ފައިނަލް މެޗުގެ ކުރިން މުބާރާތުގެ ސެކިއުރިޓީއާ ގުޅިގެން އާޖެންޓީނާ އިން ކަންބޮޑުވުން ވެސް ފާޅުކޮށްފައިވެއެވެ.

އާޖެންޓީނާ އިން ކަންބޮޑުވުން ފާޅު ކޮށްފައި މިވަނީ ކޮލަމްބިއާއާ އިން ސެމީ ފައިނަލްގައި އުރުގުއޭ ބަލިކުރި މެޗަށް ފަހު، ބޮޑެތި ހަމަނުޖެހުންތަކެއް ހިނގާފައި ވަނިކޮށެވެ. އެ މެޗަށްފަހު އުރުގުއޭގެ ބައެއް ކުޅުންތެރިން ވަނީ ސަޕޯޓަރުންގެ ތެރޭގައި ތިބި އެމީހުންގެ އާއިލާގެ ދިފާއުގައި ދާންޖެހިފައެވެ.

ކުޅުންތެރިންގެ އާއިލާ މެމްބަރުންނަށް އެންމެ އެކަށޭނަ ސެކިއުރިޓީ ފޯރުކޯށް ނުދެވޭ ކަމަށް ބުނެ އުރުގުއޭގެ ކޯޗު މާސެލޯ ބިއެލްސާ ވަނީ މުބާރާތް އިންތިޒާމްކުރާ ފަރާތްތަކަށް ފާޑު ވެސް ކިޔައިފައެވެ.