ސްކައުޓުންނާއި ގާލްގައިޑުން، މި ދައުރުގެ ތެރޭގައި ކޭމްޕްދާނެ ރަށެއް ކަނޑައަޅުއްވައި ދެއްވާނެ ކަމުގައި ޗީފް ސްކައުޓް އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ދުނިޔޭގެ 25 ވަނަ ސްކައުޓް ޖަމްބޮރީގައި ދިވެހިރާއްޖެ ތަމްސީލުކުރާ، ސްކައުޓުންނާއި ގަރލް ގައިޑުންނާ ބައްދަލުކުރައްވައި ދެއްކެވި ވާހަކަފުޅުގައެވެ. މިބައްދަލުކުރެއްވުން އޮތީ މިއަދު ހެނދުނު، މާފަންނު ސޯޝަލް ސެންޓަރުގައެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، މިސަރުކާރު ވެރިކަމަށް އައުމަށްފަހުގައި، އޭގެ ކުރިން ހީނަރުވަމުންދިޔަ އެ ދެ އެސޯސިއޭޝަންގެ ހަރަކާތްތައް އިތުރުކުރުމަށްޓަކައި ގިނަ މަސައްކަތްތަކެއް ކުރެވުނު ކަމަށެވެ. އެހެން ނަމަވެސް ކޯވިޑުގެ ޢާލަމީ ވަބާއާ އެކުގައި، އެހެން ހުރިހާ ކަމަކަށްވެސް ކުރިމަތިވެގެން ދިޔަ  ހުރަސްތައް އެކަމުގައިވެސް ކުރިމަތިވެފެން ދިޔަ ކަމަށެވެ. އަދި ސްކައުޓުންނާއި ގަރލްގައިޑުންގެ އެންމެ ބޮޑު ކަންބޮޑުވުމަކީ، ޖަމްބޮރީތަކާއި ކޭމްޕްތައް ބޭއްވުމަށް އެކަށީގެންވާ ތަނެއް ނެތުންކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، ދިވެހި ސްކައުޓުންނަކީ، އަދި ގައިޑުންނަކީ، މިހާރު ދުނިޔޭގެ ފެންވަރުގައި ވެސް ފާހަގަކޮށްލެވޭ، ވަރަށް ހުނަރުވެރި ބައެއްކަމަށެވެ. މިގޮތުން، ދެކުނު ކޮރެއާގައި ބާއްވާ މި އަހަރުގެ ޖަމްބޮރީގައި 170 އަށްވުރެ ގިނަ ޤައުމު ބައިވެރިވާއިރު، މިފަހަރުގެ ޖަމްބޮރީގެ ޕްލޭނިންގ ޓީމުގައި ދިވެއްސަކު ހިމެނުމަކީ އެކަމުގެ ހެއްކެއް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. އަދި މިފަހަރުގެ ޖަމްބޮރީގެ ޕްލޭނިންގ ޓީމުގައި ހިމެނިފައިވާ ދިވެހި ސްކައުޓް ލީޑަރ ޢަލީ ޝަފާޢަތު މަނިކަށް ރައީސުލްޖުމްހޫރިއްޔާ ވަނީ ތަޙްނިޔާ ދަންނަވާފައެވެ.

ރައީސުލްޖުމްހޫރިއްޔާގެ ވާހަކަފުޅުގައި އިތުރަށް ވިދާޅުވީ، ސްކައުޓް ޖަމްބޮރީއަކީ، ޒުވާނުންނަށް އަމާޒުކޮށްގެން، ވަރަށް މުހިންމު މަޤްޞަދެއްގައި ބާއްވާ، ވަރަށް ބޭނުންތެރި ޙަރަކާތެއް ކަމަށެވެ.