ސިހުރު ހެދިކަމުގެ ތުހުމަތުގައި މިދިޔަ ޖޫން މަހުގެ 23 ވަނަ ދުވަހު ފުލުހުންގެ ބެލުމުގެ ދަށަށް ގެންދިޔަ ކުރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް އާއި އޭނާގެ ކޮއްކޮ ފުލުހުންގެ ބެލުމުގެ ދަށުން މިއަދު ދޫކޮށްލައިފިއެވެ. އަދި ހަމަ މި މައްސަލައިގައި ހިމެނޭ، ސިހުރު ހެދި ކަމަށް ބުނާ މުލީއާގޭގެ ކުރީގެ ކައްކާ، ތ. ކިނބިދޫ، ނިވައިދޮށުގޭ، ހުސައިން ސަމީރު ވެސް ވަނީ ފުލުހުންގެ ބަންދުން މި މަހުގެ އެއް ވަނަ ދުވަހު ދޫކޮށްލާފައެވެ.

މި މީހުން ހައްޔަރުން ދޫކޮށްލި ސަބަބެއް ކަމަށް ފުލުހުން ބުނެފައިވަނީ، އެމީހުން ބަންދުގައި ބެއިތިއްބުމަށް ނުފެންނާތީ ކަމަށެވެ. ނަމަވެސް މި މައްސަލައިގެ ތަހުގީގު އަދިވެސް ކުރިޔަށްދާ ކަމުގައި ވިދާޅުވެފައިވެއެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުއިއްޒު ވެރިކަމަށް ވަޑައިގެންނެވުމަށްފަހު ޝަމްނާޒް ވަނީ ތިމާވެއްޓާ ބެހޭ މިނިސްޓްރީގެ ސްޓޭޓް މިނިސްޓަރުކަމަށް އައްޔަން ކޮށްފައެވެ. އަދި އޭނާގެ ކޮއްކޮ ސަނާ އައްޔަން ކޮށްފައިހުރީ އެންވަރަމަންޓް މިނިސްޓްރީގެ ސީނިއާ ޕޮލިޓިކަލް ޑިރެކްޓަރެއްގެ މަގާމަށެވެ. ނަމަވެސް މި ދެ މީހުން ވެސް މިހާރު ވަނީ މަގާމުން ވަކިކޮށްފައެވެ.

ޝަމްނާޒް ކައިވެނި ކޮށްގެން އުޅުނީ ރައީސް އޮފީހުގެ މިނިސްޓަރު އާދަމް ރަމީޒާއެވެ. ނަމަވެސް މިދިޔަ މަހުގެ ތެރޭގައި މި ދެ މީހުންގެ ކައިވެނި ވަނީ ރޫޅިފައެވެ. އަދި އޭގެ ފަހުން ރަމީޒްވަނީ މަގާމުން ސަސްޕެންޑު ވެސް ކޮށްފައެވެ.