ތެލުލި ބަނބުކޭލަކީ ގިނަ ދިވެހިންނަށް މީރު ލުއި ކެއުމެކެވެ. ތެލުލި ކޭލަށް ގޭގޭގައި އޮންނަ ޑިމާންޑު އެނގެނީ، ކެއު ތެލަށް އެޅުމަށްފަހު ފަސޭހައިން ފެންނަ ހިސާބެއްގައި ބަހައްޓައިފި ނަމައެވެ. ތެލުލި ކެޔޮ ދަޅެއް ނަމަ، މަދު ގަޑިއިރު ކޮޅެއްގެ ތެރޭގައި ދަޅުގެ ފޫ ފެންނާނެއެވެ. އަދި ޑަބިޔަލެއް ނަމަ، މަދު ދުވަސްކޮޅެއްގެ ތެރޭގައި އޭގެ ކަންތައް ނިމޭނެއެވެ.

މި ފަހަރު މި ކިޔާލަދެނީ، ތެލުލި ކުޅި ބަނބުކެޔޮ ތައްޔާރު ކުރާނެ ގޮތެވެ. މިއީ ތަޖުރިބާކޮށްލަން ރަގަޅު ރަހަޔަކަށް ވާނެކަން ޔަގީނެވެ.

ބޭނުންވާނެ ތަކެތި:

ބަނބުކެޔޮ

ރިހާކުރު

ފުނޑިމިރުސް

ހަދާނެ ގޮތް:

އެންމެ ފުރަތަމަ ބަނބުކޭލުގެ ތޮށި މެށުމަށްފަހު، ދެ ފަޅިކޮށް އޭގެ ކަރުގަނޑު ނަގާށެވެ. އަދި ތެލުލި ބަނޑުކެޔޮ ކޮށާފަ ހުންނަހެން ފޮތި ފޮއްޗަށް ބަނބުކެޔޮ ކޮށާލާށެވެ.

އެއަށްފަހު ފޮތިކޮށްފައި ހުރި ބަނބުކެޔޮތައް ތައްޓަކަށް އަޅާ، ރަހަލާވަރަށް ރިހާކުރު އެޅުމަށްފަހު ރަގަޅަށް މޮޑެލާށެވެ. ކޮންމެހެން ތެލުލި ރިހާކުރު ބޭނުން ކުރުން މުހިންމެއް ނޫނެވެ. އާދައިގެ ރިހާކުރު ވެސް ކަމުދާނެއެވެ.

ދެން ޖެހޭނީ އެމީހަކު ބޭނުންވާ މިންވަރަށް ކުޅި ރަހަ ހުންނާނެ ވަރަށް ފުނޑިމިރުސްގަނޑު އަޅާ މޮޑެލާށެވެ. މިރުސްގަނޑު ހަދާއިރު، ފިޔާ، މިރުސް، ހިކަނދިފަތް، ލޮނު އަދި ލޮނުމެދު ބޭނުންކޮށްލިޔަސް ފުދޭނެއެވެ.

ދެން އޮތީ އެންމެ ފަހު ކަންތަކެވެ. އެއީ ކެޔޮ ތެލަށް އެޅުމެވެ. ތެލުލާއިރު ސަމާލުކަން ދޭންވީ ރަގަޅަށް މުރަނަކޮށް ހުންނަވަރަށް ތެލުލުމަށެވެ.

މިއީ، ކުރިޔަށޤ މިދާ ފުޓުބޯޅަ މޫސުމުގެ ފައިނަލް މެޗުތަކަށް ހާއްސަ ލުއި ކެއުމަކަށް ވާނެއެވެ. ތަޖުރިބާ ކޮށްލާށެވެ.