މިހާރު އެމެރިކާގައި ކުރިޔަށްދާ ކޮޕާ އެމެރިކާގެ ސެމީ ފައިނަލުގެ ދެވަނަ މެޗުގައި މިއަދު ކޮލަމްބިއާ އާއި އުރުގުއޭ ބައްދަލުކުރިމެޗު 1-0 އިން ކާމިޔާބުކޮށް، ކޮލަމްބިއާއިން މުބާރާތުގެ ތާރީހުގައި ތިން ވަނަ ފަހަރަށް ފައިނަލުން ޖާގަ ހޯދައިފިއެވެ.

އެ ޓީމުން ފުރަތަމަ ފަހަރަށް ފައިނަލަށް ދަތުރު ކޮށްފައިވަނީ 1975 ގައެވެ. ނަމަވެސް އެ ފަހަރު ޕެރޫ އަތުން ވަނީ ބަލިވެފައެވެ. ކޮލަމްބިއާއިން ފުރަތަމަ ފަހަރަށް، އަދި މިހާތަނަށް އެ ޓީމަށް މުބާރާތް ކާމިޔާބު ކުރެވުނު ހަމައެކަނި ފަހަރަކީ ވެސް، 2001 ވަނަ އަހަރުގެ ފައިނަލުގައި މެކްސިކޯ ބަލިކުރުމަށްފަހު ހޯދި ކާމިޔާބީއެވެ.

ކޮލަމްބިއާއިން މި އަންނަ ހޯމަ ދުވަހު، މުބާރާތުގެ އެންމެ ފަހުގެ ޗެމްޕިއަން އާޖެންޓީނާއާ ދެކޮޅަށް ފައިނަލުގައި ނިކުންނަ އިރު، 2021 ވަނަ އަހަރުގެ މުބާރާތުގައި މެސީ ހަދާފައިވާ ރެކޯޑެއް މިވަނީ ހަމޭސް ރޮޑްރިގޭޒް މުގުރާލާފައެވެ. އެއީ އެއް މުބާރާތެއްގައި އެންމެ ގިނަ އެސިސްޓު ހަދުމުގެ ރެކޯޑެވެ.

ސެމީ ފައިނަލްގައި ޖެފަސަން ލޭމާ ބޮލުން ކާމިޔާބުކުރި ގޯލަކީ މި މުބާރާތުގައި ހަމޭސްގެ 6 ވަނަ އެސިސްޓެވެ. 2011 ވަނަ އަހަރަށްފަހު މުބާރާތުގެ ސްޓެޓިސްޓިކްސް ރެކޯޑު ކުރަން ފެށިފަހުން، މި ރެކޯޑު އެންމެ ފަހުން މެސީގެ އަތުގައި އޮތީ 5 އެސިސްޓާއެކުއެވެ. ހަމޭސް ވަނީ ފުރަތަމަ މެޗުގައި ޕެރަގުއާއީއާ ދެކޮޅަށް ދެ އެސިސްޓު ކޮށްދިނެވެ. އޭގެ ފަހުން ކޮސްޓަރިކާއާ ދެކޮޅަށް ގްރޫޕް ސްޓޭޖުގައި އިތުރު އެސިސްޓެއް ކޮށްދީފައިވާއިރު، ކުއާޓާ ފައިނަލުގައި ޕެނާމާއާ ދެކޮޅަށް ވަނީ ދެ އެސިސްޓު ކޮށްދީފައެވެ.

އަދި މިހާތަނަށް ކޮލަމްބިއާ މި މުބާރާތުގައި ކުޅުނު 5 މެޗުގެ ތެރެއިން 4 މެޗުގެ މޭން އޮފް ދަ މެޗަކަށް ހޮވިފައިވަނީ ވެސް ހަމޭސް ރޮޑްރިގޭޒްއެވެ.

ކޮލަމްބިއާ އިން ފައިނަލަށް ދަތުރުކުރި ގޮތަށް ބަލާލާއިރު، ގްރޫޕް ސްޓޭޖުގައި ޕެރަގުއާއީ 2-1 އިން ބަލިކޮށްފައިވާ އިރު ކޮސްޓަރިކާ ވަނީ 3-0 އިން ބަލިކޮށްފައެވެ. ބްރެޒިލްއާ ކުޅުނު މެޗު އެއްވަރުވީ 1-1 އިން ނެވެ. އަދި ކުއާޓާ ފައިނަލުގައި 5-0 އިން ޕެނާމާ ބަލިކޮށް، ސެމީގައި އުރުގުއޭ ބަލިކޮށްފައި މިވަނީ 1-0 އިންނެވެ.

އުރުގުއޭއަށް މި މެޗުގެ ނަތީޖާ ބަދަލު ކޮށްލުމަށް ރަގަޅު ފުރުސަތުތަކެއް ލިބުނެވެ. ނަމަވެސް ޑާވިން ނުނިއޭޒް އަދި ލުއިސް ސުއަރޭޒްގެ ހަމަލާތަށް ވަނީ ގޯލަކަށް ބަދަލުކުރެވޭ ގޮތް ނުވެފައެވެ. މީގެ އިތުރުން ކޮލަމްބިއާގެ ކުޅުންތެރިއަކަށް ފުރަތަމަ ހާފުގެ އިތުރު ވަގުތު ރަތް ކާޑު ދެއްކުމާ ގުޅިގެން ލިބުނު އެޑްވަންޓޭޖުގެ ބޭނުން ވެސް އުރުގެއޭއަށް ވަނީ ހިފޭ ގޮތް ނުވެފައެވެ.

އުރުގުއޭއަށް ފައިނަލުން ޖާގަ ލިބުނުނަމަ މި ފަހަރުގެ ފައިނަލް ވެގެންދިޔައީހީ، މުބާރާތުގެ އެންމެ ކާމިޔާބު ޓީމުގެ ލަގަބު އެއްކޮޅަކަށް ބުރަކޮށްލުމަށް ލިބޭނެ ފުރުސަތަކަށެވެ. މިހާރު މުބާރާތުގެ އެންމެ ކާމިޔާބު ޓީމުތަކުގެ ގޮތުގައި އޮތީ އުރުގުއޭ އާއި އާޖެންޓީނާއެވެ. މި ދެ ޓީމުން ވެސް ވަނީ މުބާރާތް 15 ފަހަރަށް ކާމިޔާބުކޮށްފައެވެ.