ރައީސް ޔާމީނުގެ ހައްޤުތައް ގެއްލިފައިވާ ކަމަށް ބުނެ، ރައީސް ޔާމީނުގެ ޤާނޫނީ ވަކީލުންގެ ޓީމުގެ ފަރާތުން ހުށައެޅި މައްސަލައަކީ ދުސްތޫރީ މައްސަލައަކަށް ނުވާތީ އެމައްސަލަ ބައިލައި ނުގަތުމަށް އެކޯޓުން ނިންމައިފިއެވެ.

ރައީސް ޔާމީނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ، އާދަމް ޝަމީމް ކުރެއްވި ޓްވީޓެއްގައި ވިދާޅުވީ، ސުޕްރީމްކޯޓަށް ދުސްތޫރީ މައްސަލައެއްގެ ގޮތުގައި މައްސަލައެއް ހުށައެޅީ، ކުރީގެ ރައީސް، ރައީސް ޢަބްދުﷲ ޔާމީން ޢަބްދުލްޤައްޔޫމަކީ ރާއްޖޭގެ އެންމެ ބޮޑު އިދިކޮޅު ސިޔާސީ ޕާޓީ ކަމަށްވާ ޕީޕީއެމްގެ ރިޔާސީ ކެންޑިޑޭޓް ކަމުގައިވުމާއެކު، ރައީސް ޔާމީންގެ ފަރާތުން ދިވެހިރާއްޖޭގެ ހައިކޯޓަށް ހުށަހަޅާފައިވާ އިސްތިޢުނާފީ މައްސަލަތައް ނުނިމި ދިގުލައިގެންދިއުމުގެ ސަބަބުން ރައީސް ޔާމީންގެ އެތަކެއް އަސާސީ ޙައްޤުތަކާއި އިންތިޚާބީ ޙައްޤުތަކަކަށް ހުރަސް އެޅިފައިވާތީ، އެޙައްޤުތައް ކަށަވަރުކުރުމަށް ކަމަށެވެ.

އެމައްސަލަ ބަލައި ނުގަތުމަށް ސްޕްރީމްްކޯޓުގެ ރެޖިސްޓްރަރ ނިންމެވީ، ރައީސް ޔާމީނުގެ ފަރާތްޕުޅުން ހުށައަޅާފައިވާ އެމައްސަލައަކީ، ކޯޓުތަކުގެ ޤާނޫނުގައި ބުނެފައިވާފަދަ ދުސްތޫރީ މައްސަލައެއް ކަމުގައި ނުވާތީއެވެ. ރައީސް ޔާމީނުގެ ޤާނޫނީ ވަކީލުން އެމައްސަލަ ހުށައެޅުއްވުމުން ބައެއް ޤާނޫނީ ވަކީލުންވެސް ވަނީ އެއީ ދުސްތޫރީ މައްސަލައެއް ނޫންކަން ފާހަގަކޮށްފައެވެ.

ރިޔާސީ އިންތިޚާބަށް ޕީޕީއެމްއިން ނެރޭނެ ކެންޑިޑޭޓަކީ، ރައީސް ޔާމީނުކަމަށް ކަނޑައަޅައި އެމަނިކުފާނަށް ޕީޕީއެމްއިން ރިޔާސީ ޓިކެޓް އަރުވާފައި ވީނަމަވެސް، ޤާނޫނު އަސާސީއާ ރިޔާސީ އިންތިޚާބުގެ ޤާނޫނުގައި ކަނޑައަޅާފައިވާ ޝަރުޠުތައް ރައީސް ޔާމީނުގެ ކިބައިގައި ފުރިހަމައެއް ނުވެއެވެ. ރިޔާސީ އިންތިޚާބަށް ކުރިމަތިލާ ފަރާތަކީ، ޖިނާާޢީކުށެއް ޝަރީއަތަށް ސާބިތުވެ 12 މަސްދުވަހުގެ ޙުކުމެއް އައިސްފައިވާ މީހަކު ނަމަ، އެމީހަކަށް އިންތިޚާބުގައި ވާދަކުރެވޭނީ، އަދަބު ތަންފީޒްކޮށް ނިމުނުތާ ނުވަތަ އަދަބު މަޢާފްކޮށްދިންތާ 3 އަހަރު ވުމަށް ފަހުގައެވެ. ރައީސް ޔާމީނުގެ މައްޗަށް މަނީ ލޯންޑަރިން އަދި ރިޝްވަތު ހިފުމުގެ ކުށް ސާބިތުވެ 11 އަހަރުގެ ޖަލުހުކުމް އިއްވާފައިވާ އިރު، ޙުކުމްތަންފީޒު ކުރެއްވުމަށްޓަކައި މިހާރުވެސް އެމަނިކުފާނު ހުރީ ޖަލުގައި ބަންދުކޮށްފައެވެ.